陳偉霆（William）、鄭融與一班歌手前晚舉行音樂派對，雖然鄭融以一身性感bra top上陣，但仍難擋William着閃爆珠片leggings的騷味，不過William事後透露有苦自己知，大呻下體「戚袋袋」。
「新城Blue Girl唱好Easter音樂會」前晚假會展舉行，出席歌手有William、泳兒、鍾舒漫、鄭融、何韻詩及農夫等。一向細細粒的鄭融以性感bra top上陣，露出小蠻腰，令人眼前一亮，不過William着上女裝閃爆的珠片leggings勁歌熱舞，搶盡女歌手鏡。
泳兒海鳴威唱情歌
William事後接受訪問時說：「着呢對leggings真係犧牲好大，全晚都『戚袋袋』呀，小William呢排都成日投訴，搞到流晒汗，因為對女裝leggings好窄，每次都要同事幫我着，我終於感受到女仔嗰種辛苦。」William透露leggings只此一對，經過五、六次表演後，難免有「異味」發出，難為造型師要狂噴消毒藥水先可以為它重釘珠片。
眾歌手除演繹多首歌曲外，更加插不少crossover環節，泳兒特別邀請海鳴威合唱情歌，大冧歌迷，而農夫這對搞笑組合除了「騎呢」伴舞之外，更唱出熱爆YouTube的成龍版《崖上的波兒》，笑到觀眾肚攣。
鍾舒漫嬲變水桶腰
為配合復活節主題，歌手都花盡心思刻意打扮，不過鍾舒漫就顯得「發福」不少，她坦言特別為今次演出花盡心思揀衫，更親手縫上珠片，她說：「我想打扮成復活節禮物咁，點知個個見到我都話我肥，又話我水桶腰，搞到我好唔開心。」
另外，William昨出席電影《天煞撞正怪怪獸》宣傳活動，他笑言感激媽咪的開聲茶，令他配音工作非常順利，更透露將灌錄兒歌，打入小朋友市場。提到關楚耀暫別演藝圈，作為朋友的他尊重對方決定，當他復出之時一定會幫到底。
採訪：音樂組