香港有傳媒月前接獲子彈恐嚇匿名信，威脅Edison四月四日後不要再亮相任何公開場合，否則後果自負，不過當事人卻選擇冒險飛抵新加坡，昨參加林超賢新片《神鎗手》記招及首映。為確保Edison安全，電影公司派出超過卅名保安，其中兩位荷槍實彈，氣氛緊張，而每位入場採訪的媒體，必須出示記者證及遭搜查隨身物件始能進場，反觀主角Edison只穿便服，神態自若，未有如早前盛傳穿避彈衣及戴頭盔亮相。
記：記者 陳：陳冠希（Edison） （司儀為新加坡DJ Cruz Teng）
記：嚟呢度驚唔驚？
陳：唔驚就呃你嘅，不過我要繼續我嘅人生，有啲嘢唔驚得咁多。
希望改善演技
記：覺唔覺得係惡作劇一樁？
陳：我都唔知寄嚟嘅係乜嘢，希望冇事啦，我諗公司叫得我嚟，應該冇事嘅……希望係咁啦。（台下全場笑聲）
記：有機會嘅話，想唔想同張栢芝及鍾欣桐合作？
（Edison正想回答，卻遭主持人打岔。）
記：你覺得自己最強嘅能力喺邊度？
陳：我諗自己好多地方嘅能力都要加強，例如演技、唱歌方面，好希望大家可以再畀機會我。
感謝朋友力撐
記：有冇諗過復出？
陳：都要睇吓呢套戲嘅反應先，當然自己都想繼續留低發展。
記：覺唔覺得慾照風波之後，冇乜人支持你？
陳：唔係每個朋友都要行出嚟先叫支持，我都收到好多慰問，呢件事上我要多謝三方面，包括我老闆啦、家人同朋友。其實要數晒啲朋友出嚟，我諗講一日都講唔完。
記：擔唔擔心自己會影響《神》片票房？
陳：呢樣嘢應該唔係一個人可以決定，當然希望大家畀機會呢套戲。
經濟支持父親
記：你爸爸陷入財困、申請破產？
陳：我哋全家人都支持佢嘅決定，金融海嘯在所難免，佢有少少問題啫，我希望今次事件可以令家人更加團結、相互照顧。你問我嘅話，我梗係想盡力幫佢，但唔會心急復出，一切要同公司商量，搵適當時機。
記：有冇好似《神》片角色咁，攞一大包錢畀爸爸？
陳：冇，不過有攞過支票。（但拒絕透露金額）
而晚上九時舉行的《神》片首映禮，有關方面原本事先張揚Edison不會亮相紅地氈，但儀式開始不久，Edison主動要求現身參與，圍觀的影迷隨即起哄。由於首映禮於空曠地方舉行，傳媒對Edison出現大感愕然，反而當事人神色自若，最後還隨大隊步上影院與影迷打招呼，前後逗留了五、六分鐘才閃人，可謂「藝高人膽大」。
Edison於十時多影片未播完就離開，大批傳媒追訪，但Edison最後失去蹤影。
文：影視組
圖：美聯社、法新社