加入快又準指紋識別 選擇性對焦影相最掂

現場第一次掌聲是給予其IP67防塵及防水功能，終於與日系機看齊；第二次掌聲則是給新加入的指紋識別器，它既可代替密碼，日後還能輔助網上付款，一舉兩得。實測所見，只要用指頭在識別器上方掃過便能登記指紋，辨識算快算準，惟登記時要掃描八次就有點費時，感覺不及iPhone 5s登記指紋般快捷。

銅金色勁受歡迎

S5外形亦予人驚喜，機背的波點花紋美觀之餘，還具有防滑作用，設計周到。顏色雖然有四款選擇，但現場最多人試的是銅金色，證明金色無論在歐亞都受用家歡迎。而雖然尺寸比S4稍大，但摸上手其實分別不大。

另一多人測試的功能是選擇性對焦功能，屏幕篤一下就能選擇對焦點，輕易就能造出不同景深效果，而且對焦不見遲滯。來自南韓的記者Jae Young就表示會因為這原因而由S4升級。特別一提，同場發表的Gear Fit由於是首隻曲面屏幕智能手錶，設計比Gear 2更具驚喜，試玩人潮不絕。