【本報訊】對於內地再現黑心油，當中包括沒有精煉過的棉籽油，含有化學物質棉酚，醫生勞永樂指出，棉籽油一般不會食用，因為所含的棉酚為男性避孕藥成分之一，存有毒性，長期食用，除了出現頭暈及氣喘，皮膚有灼傷感覺，亦會減少精蟲，損害性器官，引致男性不育，呼籲市民小心，「始終食油唔係想避孕。」
「不少當地人會喺自己屋企煉油，加上內地大牌子包裝簡單，嚟嚟去去都係嗰幾款，材料又好易買到，又容易偽冒，食到（黑心油）都唔出奇，尤其是街邊檔的食物，就更加要小心。」陳記食品集團董事長陳勇前表示，由於他在廣東及廣西均有業務，所以於內地買油時十分小心，只向大型供應商入貨，以確保安全。
對於不少港人北上消費，名廚周中提醒港人，要加倍留意黑心食品，「內地乜都有，黑心食品不知幾多，呢啲嘢已經唔係第一次，最緊要唔好隨便幫襯街邊檔，始終大餐廳有信譽，較安全。」港九罐頭洋酒伙食行商會副理事長李廣林補充：「始終用肉眼好難分到真油、假油，惟有幫襯老字號，都無得擔心咁多。」不過，他表示，本港食肆主要使用桶裝食油，一般會向相熟供應商入貨，在香港食到黑心油機會相對少些。