瀕盲玉婆婆求藥費保視力

原當酒樓樓面的玉婆婆已退休多年，早年曾有卵巢囊腫、高血壓及糖尿病等病，盆骨亦曾骨折，卻從未自暴自棄，反而積極面對人生，退休後仍到長者中心擔任義工達六年。不過，現年已屆八十一歲的玉婆婆於三年前發現視力開始衰退，更一度以為視力模糊乃白內障所致，故未有即時求醫。

難再任義工 寡居遇困難

事隔一年到私家診所檢查始發現黃斑點上眼，惜因未能及早接受治療，令右眼失去大部分視力。

「隻右眼一早睇唔到嘢，左眼就好啲，睇到報紙大標題，但啲細字就要用放大鏡先睇到，但依家連左眼都有病，都唔知點算……」自雙眼出現毛病後，玉婆婆不但未能再參與義工活動，連起居生活亦大受影響。婆婆指丈夫已離世數十年，多年來過着獨居生活，現時日常生活亦需靠鄰居協助，「收到電費單想知交幾錢都要搵鄰居幫手睇，喺屋企又只可以聽電視！」

靠綜援維生 須定期施藥

面對近日左眼視力亦有下降迹象，玉婆婆擔心恐有失明之虞，「對眼睇唔到真係好論盡，所以都希望可以保持依家咁睇到嘢，可以自己生活到，唔使連累人。」婆婆退休後一直靠綜援金維生，子女因收入亦有限無法協助，希望善長能慷慨解囊，以保住僅有視力。

基督教聯合醫院發言人證實，病人於一二年三月確診雙眼患有黃斑病變，現時右眼已失去大部分視力，左眼視力亦欠佳。醫生建議為病人左眼注射藥物「Aflibercept」以穩定視力，首三個月內每月注射一次，每次費用為港幣七千五百元 ，完成後再按病情決定其後注射次數。發言人強調，如病人不接受上述治療，病情將會惡化。

捐款編號：12612

記者：黃凱翎、林永發