搭棚工意外離世 遺屬失支柱
原屬幸福美滿的家庭，竟被一場工業意外奪去一家的歡笑，梁浩天的家人亦頓失經濟支柱。任職搭棚工人的阿天早前於工作期間，不慎碰觸外牆招牌鐵架觸電身亡。由於尚有年邁母親與仍在求學幼妹需要照顧，家人對籌措阿天的殮葬費大感徬徨。東方日報慈善基金了解情況後，從「無力殮葬」專戶撥款二萬元直接向殯儀公司支付殮葬費用，以解阿天一家燃眉之急。
睹物思人 母以淚洗面
「細佬好生性又孝順，對我哋好好，平時收工好多時都係陪屋企人，究竟點解會發生呢件事？佢走咗對我哋打擊真係好大！」浩然指胞弟阿天上月爬出外牆棚架工作期間觸電身亡，事發後至今仍難以釋懷，談及意外時更一直強忍淚水。家人亦同樣無法接受阿天突然離世的事實，尤其是母親與年幼胞妹所受的打擊最大。
阿天床邊一直放着一個殘舊褪色的籃球，記錄兄妹數人昔日在籃球場上嬉戲的歡樂時光。梁母連日來為阿天執拾遺物時，亦因睹物思人而情緒激動，終日以淚洗面。「我好早就出嚟做嘢，要去到上水返工，好多時都唔喺屋企，所以阿媽阿妹同細佬嘅感情特別好。」浩然坦言，每當目睹母親因白頭人送黑頭人而流淚的一刻即倍感心痛。
僅讀完中五 搵錢養家
「細佬讀完中五已經出嚟做嘢搵錢養家，大部分收入都畀晒屋企，自己都冇乜錢剩。」浩然指家境雖然清貧，母親亦是長期病患者，卻從未有申請取綜援的念頭，兩兄弟一直堅持自力更生。「雖然阿媽好多病痛，又要供阿妹讀書，但我哋都想靠自己，細佬做搭棚呢種高危工作都係想幫屋企搵多啲錢！我哋知道阿妹好叻，讀得書，所以細佬一直以供佢讀大學為目標。」
對於阿天突然離世，家人既感悲傷，同時亦倍感徬徨，「屋企嘅支出唔細，阿媽長期要睇醫生食藥，阿妹又就嚟考大學要補習費，依家細佬走咗又要一筆錢，我份糧唔係好支持到，好在有東方日報慈善基金幫手……」浩然對於基金的及時施援致以衷心感激，坦言暫時可鬆一口氣，「呢筆錢幫我哋減輕唔少負擔，好多謝善長仁翁。」
捐款編號：12609
記者：葉展皓、林永發