新居缺家電 劉伯盼善長施援

現年六十六歲的劉雲宋年輕時憑着靈活頭腦與努力，由廠房工人直至建立自己的廠房，八十年代更將廠房遷至內地發展，「我二十幾歲出嚟做嘢，後生身體好，肯搏肯捱終於做到有自己嘅廠，嗰陣好風光……」劉伯憶述當年三十出頭便成為玩具廠及製衣廠老闆，衣食無憂，亦擁有多個物業，萬料不到如今要為一個熱水爐與普通家電而四出籌謀。

家財化烏有 做義工拾生趣

隨着金融風暴橫掃亞洲，劉伯的公司最終清盤收場。劉伯指企業為無限公司，所有物業、資產全用作抵債。家財頃刻化為烏有，妻子未幾亦因惡疾離世，家財散盡加上老伴離去，劉伯坦言難以接受，更一度有了結生命的念頭，「白手興家，打拚咗咁多年最後乜都冇晒，真係接受唔到，好彩有社工幫我，仲帶我做義工。」劉伯指當時獨居於屯門劏房，獲社工協助之餘，更悟出助人自助的真諦。

「我以前冇諗過幫人係咁開心，幫老人家整好把風扇，佢會笑得好開心，自己就有好大嘅滿足感！」劉伯在社工協助下，曾為長者維修電器及家具，直言長者歡愉笑容亦成為他排解抑鬱的良藥。即使劉伯現時需靠綜援維生，生活「掹掹緊」，但每日早上仍會買麵包送給附近有需要的長者。

不過，近年劉伯身體逐漸轉差，身體日漸消瘦，更需經常出入醫院，已無法再當義工，平日只能留在家中以電視為伴，可惜近日使用經年的電視機亦告損壞。「依家電視機都冇埋，得番啲雪花，平日想睇新聞都冇得睇。」劉伯感謝基金協助安裝熱水爐，希望再有善長施以援助，協助重置電視機。

捐款編號：12548

記者：楊育輝