在一片探索太空熱潮帶動下，不少學生均對科技產生興趣，惟生於草根家庭的小朋友則較難有機會接觸另類學習。在東方日報慈善基金的資助下，廿二名八歲至十二歲、來自聖公會聖匠堂的學童，終於有機會學習製作機械人，由設計到製作均一手包辦。

「郁嘞！我哋砌嘅機械人終於郁嘞！」十一歲的恒仔自小對機械人玩具特別感興趣，在五日的夏令營期間，除專心聆聽導師講解外，更留意每一個細節，「平時我都會砌吓啲普通機械人，但依家呢個可以自己設計個程式，仲可以駁電腦一齊用！」

至於與恒仔同組的姊弟樂嘉及樂熊，同樣對製作機械人深感興趣，更將三人的精心傑作與其他組員比賽，實行一較高下。

「畀心機設計 一定可以贏」

信心「爆棚」的樂熊更揚言，「我哋咁畀心機設計，一定可以贏嘅！」

在另一組別中，年僅九歲的少聯則對每個細節一絲不苟，「我好鍾意玩電腦，砌機械人加埋電腦程式一啲都難唔倒我。」

「之前教嘅都係中學生，佢哋有數學概念，做起上嚟容易啲；但呢班大部分都係小學生，佢哋都做得好好！」負責統籌是次活動的理工大學電子計算學系二年級學生阿彥，對參與活動的學童大加讚賞，並指有青出於藍之勢。

聖公會聖匠堂社工朱姑娘表示，基層學童的家長未必能負擔暑期活動開支，是次活動可讓學童增廣見聞，「今次真係好多謝東方日報慈善基金嘅資助，佢哋先會有呢次學習機會！」

記者　梁少儀