有性趣:古靈精怪蜈蚣袋

古代房中助陽偏方有好多,而當中並非全部都係食用藥方嚟,其中就有呢樣幾稀奇古怪,報稱能令男士兵器變粗變長,兼且具有提升授孕率嘅「興陽蜈蚣袋」。

布袋需掛足21日

喺明代洪基所著嘅《攝生總要》及年代不詳嘅《古代房中秘方》之中,記載「興陽蜈蚣袋」嘅材料分別係蜈蚣一條、甘草及甘遂各三分,將所有材料磨成粉末,然後裝入用素白絹製成嘅袋內,再紮住喺兵器21日便可。文中稱:「此時觀形勢完備,舒展長大,粗不可言,其龜蒼老,後不須用藥以固定元陽,方可入爐採戰,取勝無厭。此訣為人不可不知也。知者樂一生,不但延年而廣後嗣矣。」意思係指用後兵器變得又粗又大,以後唔使用藥固定元陽,仲具有延年益壽及提升生育率添!

網民親身嘗試

估唔到真係有網民親身一試,而結果有兩個,一個話戴咗呢個袋21日後,除咗兵器有啲唔舒服外,覺得冇乜效果。另一個則話心理上好似有作用,效果卻並冇古籍中所講咁有奇效,當然呢啲偏方都係睇過就算啦!