喺床上令女伴欲仙欲死，係唔少男士夢寐以求嘅本領，而喺中國幾千年文化中，出現過唔少催情偏方，其中一道叫「美女一笑散」，相傳可以挑起女性嘅情慾，究竟係咪真有其事呢？
「美女一笑散」唔係亂吹出嚟，明代醫家洪基嘅著作《攝生總要》就有記載，其成分包括青木香、龍骨、山茱萸、蛇床子、遠志、官桂、石榴皮等，原文稱：「將各等分上為細末，每次少許，男津調入女戶，行九淺一深之法，女情歡美，四肢困懈，情不能已矣。」簡單嚟講，就係將上述材料碾成粉末，混合男性口水，搽喺女性私處，再加上九淺一深嘅交合法，就能爽到女伴典床典席。
雖然書中並無寫清楚各種材料嘅比例，但當中唔少藥材都熟口熟面，好似龍骨、山茱萸、遠志等，只係蛇床子比較少見。據醫書記載，呢種藥材歸腎經，可用於因腎陽衰微及下焦虛寒所導致嘅陽痿，亦適用於女性因宮寒而不孕嘅情況，通常跟熟地、菟絲子、五味子、肉桂等藥材同用，具有溫腎益精嘅功效。
至於另一種材料青木香，即係馬兜鈴嘅根部。據明代張介賓撰寫嘅《景岳全書》記載，呢種藥材味苦微辛，性寒，具有治療頭風、瘙癢、禿瘡等作用，亦能治熱腫及蛇毒，但並無提及對男性雄風有用，而且有毒，不可多服！再講，每個人嘅體質都唔同，所以呢道偏方嘅效用存疑，大家睇完，當長吓知識就算，千祈咪亂試！