所謂路不轉人轉，如果你作為球星，見到隊波嘅前鋒又美斯又麥巴比，仲有利雲度夫斯基，咁就梗係要轉踢其他位啦。而做藝人都係一樣，知道自己好難做到一線明星，不如做諧星搞吓笑可能仲有得發圍，好似井上咲樂就以醜女形象成功突圍啦！
好多人都話啲女仔係靠化妝去欺騙男人，不過咁都唔係錯嘅，至少佢哋會為咗男人而悉心打扮嘛！事實上，化妝打扮的確可以令女仔形象大轉變，變得更加嬌俏迷人，就好似井上咲樂咁喇！
今年21歲嘅佢甜美又可愛，面上仲泛起幾分秀雅之氣，不過之前佢其實冇咁靚，兩堂眉又粗又開叉，仲成日束起頭髮變成春麗頭，行為又男仔頭，直情成個女版張飛咁款呀！家陣佢執番靚個樣，吸引力大大增加，加上佢盡情展露白嫩又婀娜嘅身材，好多人都話估唔到佢原來身材嬌小得嚟咁好波！
咲樂係演員出身，2015年參加「第40屆天才發掘CARAVAN」大賽時，扮演戇豆先生奪得「SoftBank獎」，因而獲得藝能事務所嘅藝人合約，出道以來都以搞笑演出為主，配合醜女形象嘅風格，吸引到好多觀眾注意。
除咗擅長搞笑，為人熟識之處亦在於佢嘅「特殊喜好」，就係鍾意飼養昆蟲以及食用昆蟲喇！佢演出過好多飲食節目，當中佢品嘗好多由昆蟲炮製嘅料理，更親自示範點樣烹飪出好食嘅昆蟲菜式添！現時佢正式進軍寫真界，亦擔任唔少電視節目嘅主持，仲有參與演出電視劇，發展相當順利。
井上咲樂近期工作多多，除咗拍寫真，亦有做主持，想知道阿妹最新工作情況，可以多啲留意佢嘅社交網喇！
網址：https://twitter.com/bling2sakura
年齡：21歲
身高：5呎
三圍：35C-23-34
撰文：賢