坊間傳聞飲啤酒會殺精，不過意大利有研究稱，酒精飲品不但唔會殺精，反而會提升受孕率，究竟邊種講法至啱呢？2005年由英國倫敦國王學院教授Lynn Fraser發表嘅研究報告稱，如果男士每日飲3支啤酒，並連續飲5日嘅話，會令血液中嘅睾酮值降低，精子量亦會減少百分之十七，從而影響性能力及生育能力。另一方面，如果女士大量飲啤酒，亦會令受孕率機會大幅下降。
因大量並長期飲啤酒，會影響男女生育能力關係，所以2016年出版嘅《中國居民膳食指南》，便提議成年男性每日酒精攝入量唔多於25毫升，女士則不應多於15毫升。以一支酒精濃度5%嘅640毫升啤酒嚟計，便已含酒精32毫升，咁計嘅話，其實已經超標喇！
不過，意大利一項研究發現，如果每周飲7小杯啤酒嘅話，精子數量會更多。研究負責人Elena Ricci博士稱，男士每周攝入62毫升至87.5毫升酒精，相對唔飲酒或僅攝入37.5毫升嘅男士，精子濃度會更高，只係當中原因亦有待深入研究。