每當搜尋具壯陽作用嘅中藥，總會見到「菟絲子」呢個名字，而入藥部分通常為南方菟絲子（Cuscuta australis R.Br）同菟絲子（Cuscuta chinensis Lam.）嘅種子。呢種旋花科植物，常見於中國，喺秋季果實成熟時，農民會收割地上部分，曬乾後打下佢嘅種子。
關於菟絲子嘅功效，坊間流傳一則故事：話說以前有個養兔仔嘅牧童，某日發現一隻愛兔有腰傷，於是放佢入田野中食草，幾日後，兔仔嘅腰傷好番晒，牧童留意到佢鍾意食一種形態好似絲一樣嘅寄生植物。過咗一排，呢位牧童嘅爺爺被腰患復發搞到好唔舒服，於是佢採集呢種植物，曬乾後畀阿爺服用，結果一個月後腰傷痊愈，於是牧童將植物取名「菟絲子」。
喺中醫學角度，菟絲子具有壯陽作用。據五代時期嘅著作《日華子本草》記載：「（菟絲子）補五勞七傷，治泄精。」明代倪朱謨撰寫嘅《本草匯言》亦指：「主男子陽道衰微，陰莖微弱，或遺精夢泄……」由此可見，菟絲子可以補腎陽及腎氣，達到固精壯陽嘅作用，從而增強性能力同改善生殖內分泌。
另外，根據一項關於黑腹果蠅交配次數嘅實驗中發現，菟絲子含有皮素、膽醇、皂類等成分，可令黑腹果蠅交配次數提升！
通常用嚟沖泡菟絲子茶，方法簡單，先準備菟絲子12克同綠茶3克，將菟絲子搗碎，加入適量冰糖及綠茶，用熱水沖泡，焗10分鐘左右就可以飲用。據稱，呢杯茶具有治療男子不育、性慾低下，同埋因肝腎陽虛產生嘅消渴症。