眾所周知，模特兒界一向多靚女，尤其喺韓國，美容同整容技術咁高超，就算唔靚都會執到靚，所以要喺業界撈得掂，真係唔容易！今日介紹嘅韓模算係一位幸運兒，佢嘅名字叫文架景，人氣都幾勁吓，點解咁受注目？講到尾都係同個靚字有關。喺韓國京畿道富川市出生嘅佢，天生麗質，細細個已經諗住投身演藝界，仲喺水原大學修讀戲劇與電影學士學位，絕對係美貌與智慧兼備。由於阿妹嘅樣貌出眾，身材又夠晒玲瓏浮凸，大學時期已經被星探發掘，開始從事模特兒工作，唔少男士都被佢嘅外形所迷倒。再者，佢嘅身高有172公分，每次換上短裙、熱褲等性感裝束，即時露出一對修長美腿，所以不論做車模定賽車女郎，都可以輕易成為場內焦點！