呢個世界諗唔明嘅嘢有好多，好似「菊花」竟然暗指屁股，而且最近更流行「日肛浴」嘅玩法！而著名成人影片網站Pornhub早前公布為2019年下定義嘅熱門搜尋詞，當中排第二名嘅竟然係外星人！外星人啪啪啪喎，你有冇興趣睇先？
2019年有太多事發生，你覺得用乜嘢詞語可以概括呢一年呢？根據著名成人影片網Pornhub，早前公布為2019年下定義的熱門搜尋排名嚟睇，結果有啲出人意表！我哋先從第十名開始倒數，分別係調教、ASMR、Apex英雄、雙性戀、熟女同Cosplay。ASMR中文叫「自發性知覺高潮反應」，即係透過聲音令人產生快感，而《Apex英雄》則係今年嘅超人氣電玩，難怪網民對相關嘅鹹片有性趣。至於第三位就係「第一身視角」（POV），而佢排上第三位嘅原因係VR器材嘅普及，導致呢類作品人氣愈嚟愈高；第二位相信大家絕對估唔到，竟然係外星人！據稱原因係2019年外星人題材再次引起大家關注，之但係乜嘢人會對外星人啪啪啪有性趣呢？呢點真係耐人尋味。第一位則係素人，呢個結果相對外星人嚟講，起碼都正常啲啦！
日光浴我哋就聽得多，至於「日肛浴」大家又聽過未呢？話說歐美網上早前流行一種名為「Butthole Sunning」（菊花日光浴）嘅玩法，有人聲稱平時曬吓個理論上見唔到陽光嘅「菊花」約半分鐘，就可以改善睡眠質素，又有人話曬「菊花」可以令精神變好，亦有人話可以起到減壓作用，甚至有人稱透過呢種方法所獲得嘅維他命D，可以令身體維持喺健康狀態等等。姑勿論有冇作用，卻有唔少歐美網民將曬菊花相上載社交平台，而日本人氣AV男優清水健亦係其中之一。不過佢就唔係用「Butthole Sunning」作為張相嘅標籤，而係自創「日肛浴」呢個名。喺佢嘅「推動」下，有唔少日本網民跟風。不過有學者表示未有證據顯示「日肛浴」有助健康，反而將菊花呢個脆弱部位暴曬，有增加患上皮膚癌嘅可能性。
節日用嘅拉炮同J杯有乜關係？本來冇，但日本情趣用品生產商TENGA卻將兩者扯上關係！近年致力將產品多元化及衝出情趣用品領域嘅TENGA，早前就發布咗一款名為「TENGA CRACKER」（TENGAｸﾗｯｶｰ）嘅拉炮。據TENGA發言人稱，因為臨近年尾多個大型節日，因此喺12月20日將佢推出市場。為咗突出品牌形象，拉炮嘅外形同旗下著名嘅J杯造型一模一樣，而每個拉炮嘅售價為550日圓。不過正因為佢嘅外形同著名嘅J杯一樣，唔少網民就話應該喺上面加有警告字樣，等男士唔好真係當咗佢係J杯嚟用。亦有網民話應該將佢加入真J杯功能，咁樣可以一物二用。其實呢個J杯……唔係，係拉炮，TENGA亦有用心設計過，皆因佢射出嚟嘅膠帶係連接式，發射完後可以輕易回收。
撰文：魂