迷信男友難服侍

有啲嘢真係唔知叫做迷信定係習慣,講出嚟好似冇乜嘢,但箇中受影響嘅人就會覺得好煩腦,好似一位女網友咁,佢男友有個習慣,就係每日都會睇吓當日運程,若然唔係好日子就會拒絕交歡。女網友話:「起初我都唔知問題咁嚴重,皆因我哋唔係成日做,但同居之後,就發覺好有問題,有幾次我主動提出交歡,佢竟然話唔係吉日,要聽日先至做,乜上床都要擇吉日嘅咩?唔單止咁,佢有時會要求我着某種顏色嘅底褲上床,話旺財運喎!我真係頂唔順,最近已經搬番去阿媽度住,仲考慮同男友分手添!」

網友回應:

CommandNO:以前聽過啲人話唔可以「衝紅燈」,因為唔吉利,但係好似你男友咁要擇吉日上床同着旺財底褲,真係聞所未聞,我好有興趣想知佢係做乜嘢職業呢?

蛋糕遊學:乜咁煩o架!呢種男人真係要飛啦!迷信成咁如果唔影響其他人都算,搞到身邊人都覺得佢煩就真係難忍,好彩你發現得都算早,如果結咗婚真係有排頭痕。

邊度有男人:你有冇試過用同一個方法對佢呢?你可以試吓當佢有需要時,同佢講今日唔吉利不宜上床,叫佢聽日先搞,睇吓佢有乜反應?

心儀筆:其實唔理係迷信又好,習慣又好,兩性相處但求舒服,而佢令你覺得唔舒服,真係要好好考慮一下你哋嘅關係。

撰文:魂