展現生命力

喺日本藝能界，如果有女星被傳出介入其他人嘅婚姻，事情往往會被鬧大，疑似成為小三嘅女星更加會被大眾口誅筆伐，星途隨時就此玩完。早前，演藝事業正值當頭起嘅今田美櫻就被傳與已婚嘅藝能事務所社長有染，好彩事件已經平息，最近美櫻更加活躍起嚟，而第一件事當然係宣傳自己嘅第一本寫真集《生命力》啦！

21歲嘅今田美櫻被稱為「福岡第一可愛美少女」，出道以來人氣一直上升，從好多時尚雜誌都可以見到佢嘅演出，此外今年4月演出新版《流星花園》之後，人氣更加直線上升，明年又有新戲《君は月夜に光り輝く》上映喇。

美櫻樣子俏麗可人又甜美，肌膚鮮嫩雪白，而且上圍豐滿，所以除咗拍戲，亦會拍水着寫真，最近推出嘅《生命力》就係美櫻嘅首本寫真集。今次佢去到家鄉福岡及沖繩取景，將當地自然美景配合誘人身材融為一體畀大家欣賞之外，亦收錄咗好多美櫻喺工作時拍低嘅花絮照片，展示工作時幾咁認真同投入，同時將美櫻發展藝能事業時所發揮嘅生命力呈現，而呢本寫真集喺美櫻剛剛從大劫當中成功「逃生」後推出，可謂別具意義。