天災無情風俗店有愛

喺女人眼中嘅好男人,其中一個條件就係唔可以去風俗場所,不過有時啲嘢唔可以講得咁絕,皆因早前日本北海道發生地震,導致部分地區停水又停電,當地一間風俗店便推出平價沖涼服務,仲可以充電,名副其實係大愛呀!

¥500洗白白

正所謂「天災無情,人間有愛」,每當有災難發生時,人與人之間嘅互助互愛,都會喺呢個時候顯現出嚟,好似日本北海道有間泡泡浴風俗店就為災民提供便民服務。呢間位於札幌中央區風俗街嘅泡泡浴風俗店「看護學院」,係一間主打女護制服誘惑嘅風俗店,話說早前北海道發生地震,唔少地方因此而斷水停電,同時有唔少浴場及店舖亦因此暫停營業,有見及此,呢間風俗店於事發當晚喺官方Twitter上發文,表示不但會暫停所有風俗服務,同時將浴室服務延長至子夜,有需要嘅居民只需要付500日圓(約35.5港元),便能夠使用浴室沖涼,同時可以使用半小時充電服務,出入場人士不限男女,並呼籲網民將呢條訊息分享出去。翌日當地唔少地方嘅水電仍然中斷,於是風俗店再次將利民服務時間延長,讓更多有需要居民能使用佢哋嘅設施。呢種親切嘅舉動不但獲得讚許,同時有去過沖涼嘅網民表示,之後一定要幫襯呢間風俗店作為答謝。不過有網民就好奇問,唔知當時風俗店有冇收埋啲凹形櫈同水床呢?如果畀小朋友見到嘅話,真係唔知點解釋呢啲櫈同床嘅用途囉!

最高貴香艷內衣

如果想令性感內衣再性感啲,大家諗唔諗到乜嘢辦法呢?相信不外乎減少布料及以透視設計。咁如果想令內衣性感得嚟又有貴氣,又可以點做呢?將布料變成金絲?未免太過俗氣喇!有「世界上最貴又最香艷」內衣品牌之稱,嚟自英國嘅Agent Provocateur就推出咗一個名為「Adora」嘅內衣系列,等大家明白乜嘢叫做性感同奢華內衣嘅極致。稱佢做極致一啲都唔過分,論性感嘅話,佢分別用兩塊金屬乳貼,同埋一條縫有金屬片嘅T Back嚟遮住三點,至於身體其他部分則會完全露出,因此對於女士嘅身材有極高嘅要求,尤其係佢只得乳貼關係,雙峰唔夠堅挺嘅話,就會好難睇。至於奢華方面,以玫瑰金及銀色金屬片製成嘅乳貼同底褲,本身已經貴氣十足,加上流蘇頸飾同頭飾,散發出一股王族貴氣,兼且令身材睇起嚟更加誘人,最重要佢嘅價錢真係相當昂貴,盛惠2,000英鎊一套,約20,694港元。不過有網民話,呢套內衣係就係性感,只係實用性差啲,平日一定唔會穿着囉!坦白講,呢件咁奢華嘅內衣,又點會係我哋呢啲平民穿着呢?

提升關係講後戲

所謂「盡信書不如無書」,呢句說話用喺坊間嘅性學專家意見上嘅話,真係會好有同感,事關有性學家表示,要提升兩性關係,喺前戲要做足功課,又有性學家指想兩性關係融洽,一定唔可以忽略後戲,好似英國兩性關係專家Annabelle Knight就話後戲真係好重要。佢話唔少男女完事後就會轉身瞓覺,佢認為前戲係熱身,啪啪啪過程係比賽,完事後嘅後戲係放鬆嘅時候,而呢個時候正正係整個性愛過程嘅重點。佢指出後戲過程可以拉近大家嘅關係,同時又可以作為下次性愛嘅起點,能夠令對方喺肉體得到滿足後,感受到對方喺心靈上嘅關懷及分享感。講到後戲如此重要,咁應該要做啲乜呢?Annabelle Knight認為最簡單嘅方法就係接吻同擁抱,如果可以一齊沖涼或互相按摩身體一番嘅話,效果會更加好,事關沖涼同按摩,可以讓對方明白到你唔嫌棄佢嘅身體,同時又可以增加彼此身體接觸嘅時間,最重要係透過呢個過程,雙方可以傾訴一下剛才床戰嘅感受,透過呢種互相坦白及了解嘅機會,有助彼此關係變得更加融洽,而非單純嘅慾望發洩。專家嘅意見又幾有道理,咁即係話其實前戲同後戲都咁重要囉!

撰文:魂