雖然仲未到萬聖節，但係日本AV界天后級女優西野翔早前就進行鬼屋挑戰！佢應一個名叫《てる散步》嘅節目邀請，去到心靈偶像柳亞嘅屋企住咗一晚。柳亞報稱自己能夠同靈體溝通，而且本身相當招惹靈體，亦因為咁佢嘅屋企可謂相當「猛」！為咗一探究竟，西野翔同節目男主持膽粗粗去拍攝，起初西野翔拎住部攝錄機四圍拍攝都顯得一臉好奇同開心，不過同柳亞食晚餐嘅時候，柳亞就表示屋企起碼有四個靈體，已經搞到翔妹有少少心慌慌，之後翔妹換上性感豹紋內衣入到浴室諗住浸浴，點知水龍頭突然由開變關，嚇到佢呱呱叫！不過翔妹都仲未知驚，同男主持就寢之後，翔妹開始覺得中伏，因為瞓低冇幾耐就聽到好多詭異又低沉嘅聲音，但係男主持已經瞓到成隻豬咁，至於無助嘅翔妹呢一晚點過呢？咁就要等到節目正式出街先知！不過大家都唔使驚翔妹出事，因為近日翔妹仲有不斷更新社交網，仲透露自己吃喝玩樂不知幾快活。