呢期男士真係有眼福，皆因有美腿春麗妄想寫真欣賞，由寫真女優倉持由香Cosplay演出，嗰對白滑美腿真係正到爆！另外，最近日本推出一套天使與魔鬼主題內衣，萌味十足又性感，令人愛不釋手。
如果要數街機遊戲《Street Fighter》系列中最具人氣嘅角色，肯定非春麗莫屬，一對誘人美腿配搭高衩底褲，真係引死人！每次見到佢使出「百裂腳」同「迴旋鶴腳蹴」時，老實講，焦點都落喺佢下半身度，之但係二次元世界嘅春麗，又點及得上真人版咁吸引呢？話說日本Redbull最近喺官網進行名為「妄想寫真館」計劃，搵嚟知名男女扮鬼扮馬介紹日本特色文化，繼之前搵嚟筋肉男清水泰地Cosplay《Street Fighter》中嘅蘇聯佬展現日本嘅浴場文化後，今次就搵嚟擁有39吋盛臀嘅寫真女優倉持由香Cosplay春麗，並加入埋故事設定，講述春麗係一位搜查官，為咗接近疑犯而化身成一間中華料理店嘅女侍應，期間佢好認真咁喺店內工作，打掃、入廚及送外賣等統統都做齊。老實講，搵倉持由香扮演春麗確實係個明智嘅選擇，皆因佢擁有一對美腿同分量十足嘅巨臀，可愛嘅樣貌更係萌味十足，因此寫真嘅最大賣點，必定係一對養眼美腿。雖然呢輯寫真以「妄想」為主題，但並唔係18禁嗰種，因此唔好祈望會有超性感火辣嘅場面出現，不過就拍得相當有美感，粉絲們千祈唔好錯過啦！
如果有選擇困難症嘅女士，呢款由日本品牌推出嘅天使同魔鬼主題嘅內衣，相信會令佢哋難以抉擇。呢套以萌味及性感為設計意念嘅內衣分為3個部分，分別係長袖大V領針織上衣、性感丁字褲及髮箍。上衣領口超闊，足以露出香肩之餘，如果上圍有番咁上下分量嘅話，仲可以露出事業線，配合超性感嘅丁字褲，前面睇固然養眼，從後面睇更可盡情欣賞到誘人嘅美股。至於戴上有兩隻角嘅髮箍，真係好萌呀！既然係咁，天使同魔鬼兩款內衣嘅分別係咩呢？白色「天使的針織內衣」（天使のニットランジェリー）嘅特點在於佢嘅髮箍同底褲背面都有一對天使翼，而黑色「魔鬼的針織內衣」（惡魔のニットランジェリー）則分別喺髮箍同底褲背面有一對惡魔翼。雖然有日本網民認為呢兩款同系列內衣嘅設計上分別唔大，但無可否認佢唔單止夠性感，萌味亦十足，若然女友着住呢套內衣喺佢哋面前出現嘅話，真係樂於每晚游走天堂與地獄之間。每套內衣售價2,399日圓（約170港元），價錢唔算貴，有興趣嘅話，不妨買晒兩套內衣看門口。
撰文：魂