愛情呢樣嘢正因為當中嘅玄妙，先至一直以嚟都吸引男女，就好似有時以為對方並非自己真愛，點知有日卻發現原來佢至係自己夢寐而求嘅伴侶。嚟自英國威爾斯嘅情色小說家瑪麗‧貝洛嘅小說《愛情姍姍來》，正正係以此作為主題。故事講述男主角雪凌福伯爵，喺5年前嘅婚禮為咗一位已婚女子中途離開，更同對方私奔兼離開倫敦。不過如今女方已然離開，兼且喺面對祖父威脅斷絕經濟來源下，佢只好答應喺15日內娶到一位有體面兼門當戶對嘅新娘，先至可以維持豐厚收入及住豪宅。另一邊廂，作為莫頓伯爵親家姐嘅瑪格，因為多年嚟盡責養育細佬妹，一直無暇結識異性，至今30歲嘅佢仍然單身。為咗搵到另一半，佢返回英國試圖尋回當年暗戀對象，點知得悉對方已經結婚，而瑪格惟有訛稱自己已跟人訂婚，未婚夫就係社交界中惡名昭彰嘅雪凌福！就係咁，瑪格同雪凌福無啦啦拉埋天窗，原以為只係過住平淡嘅霧水夫妻生活，但兩人卻漸漸孕育出愛苗，並且發生肉體關係，究竟呢段感情係真愛定錯愛呢？