情慾小說多數以壞男人做主題，皆因令男讀者睇得更投入，而隨住女讀者群愈嚟愈多，以壞女人為主題嘅情慾故事亦變得相當有市場，而講到當中嘅人氣作品，就要數由美國情慾小說家奧黛莉‧卡蘭著作嘅《月曆美人》。故事講述女主角米亞係一個樣靚身材正，而且性格狂野嘅女人，點知男友唔生性，借落大筆高利貸，搞到作為擔保人嘅佢被黑幫追殺，為咗可以喺一年內搵到過百萬美元還債，喺別無選擇嘅情況下，米亞走去做名為「月曆美人」嘅高級伴遊，工作相當簡單，每個月被安排陪伴某位富豪，並且遵守5項規條，分別係要保持最佳狀態、時刻保持微笑、除非客人同你講嘢，否則唔可以主動開聲、必須隨時提供服務及合約中並唔包括提供性服務。對於呢種齋陪唔使上床嘅工作，米亞決心搵夠錢後就唔撈，點知首個客人竟然係個擁有結實肌肉嘅型男，令米亞芳心大動，同時又感到相當好奇，如此出眾嘅男人點解需要花錢搵伴遊呢？想知點解，大家就要買本書睇喇！