每次夏天來臨，見到一班年輕嘅男男女女去海灘玩得不亦樂乎，小弟都會感受到青春消逝嘅唏噓。雖然小弟嘅青春所剩無幾，但換來嘅係成熟穩重以及人生經驗，至於志村理佳呢位藝能偶像就覺得青春係用嚟換取韻味以及妖媚喇！
夫妻之間有所謂「七年之癢」，即係結婚7年左右雙方都會覺得缺乏新鮮感，因此心癢癢要從其他異性身上尋找刺激。而日本藝能界美少女團體當中，有唔少成員都係效力6、7年就要畢業往外發展，咁又係嘅，連續喺同一間公司做咁多年都會覺得悶啦！呢類團體新人極多又青春活潑，舊隊員好多時都會被比下去，唔走唔通想等畀後輩叫你收檔咩！所以作為美少女偶像團體SUPER☆GiRLS最年長成員嘅志村理佳就下定決心從團體畢業，轉而作個人發展。
25歲嘅志村理佳五官標致，面帶幾分柔弱同時不失青春俏麗，並且泛起絲絲妖媚神態，簡簡單單擺個海棠春睡姿態已經相當撩人。雖然理佳身材唔係話屬於激凸型，勝在身形纖瘦，卻又唔會令人覺得瘦骨如柴，而且肌膚滑溜，加上識得用誘人姿勢嚟突出體態美感，拍出嚟嘅性感寫真養眼度十足。
志村理佳喺2010年參加青春偶像選拔活動「Avex Idol Audition」，經考核並得到合格成績之後，就成為美少女偶像團體「SUPER☆GiRLS」其中一員。理佳加入團體迄今已經有8年，由當年17歲成長到今年25歲，由於其他成員全部都係十八廿二嘅妹妹仔，年紀最大嘅理佳自然就成為照顧佢哋嘅大姐姐，唔怪得理佳青春得嚟又有幾分穩重感覺啦。理佳於今年初同另一位成員田中美麗齊齊宣布從團體中畢業，而田中美麗嘅原因係工作太多，以致佢身體健康欠佳，至於理佳又點解要走呢？理佳表示係因為覺得自己效力咗團體咁耐，都係時候出去闖一闖，仲話所有青春已經為團體奉獻，相信離開都冇乜遺憾喇。咁阿妹唔做「SUPER☆GiRLS」成員又諗住向邊一個方向發展呢？理佳話自己好鍾意動物，因此想做動物護理工作，不過暫時未能夠實現呢個理想，都係集中精神拍水着寫真先。
簡介：志村理佳隆重引退，從佢嘅社交網站中可以睇到好多引退公演嘅花絮，當然亦會見到理佳近期拍下嘅性感寫真喇！
網址：https://twitter.com/sg_rika_avex
年齡：25歲
身高：5呎3吋
三圍：32-23-33
撰文：賢