所謂萌系女性，佢哋都有個相同嘅特徵，就係擁有大眼、小嘴、細臉同五官分明嘅輪廓，若然想成為男士們心目中嘅萌系女神，更係需要有美貌同玲瓏浮凸嘅身材。不過萌系女神中亦分有兩種，一種係熱情活潑，另一種就好似南韓人氣模特兒沈珉希咁冷傲迷人。
如果有留意南韓模特兒界嘅話，會發現大部分嘅人氣模特兒都屬於熱情又富有女人味嘅一類，雖然呢類型嘅模特兒係業界嘅主流，但係唔代表其他類型嘅模特兒唔受歡迎，好似沈珉希咁就係憑住與別不同嘅萌系外形，卻又有帶點冷傲嘅個性，而成為人氣模特兒。沈珉希細個嘅時候生得相當可愛，經常喺街上被星探發掘拍攝童裝廣告，但係父母覺得佢年紀太細，同埋對模特兒呢行唔認識，便拒絕對方嘅邀請，不過父母唔知道，原來當時沈珉希對模特兒工作已十分感興趣。
及至讀大學嘅時候，沈珉希對模特兒工作嘅興趣未有減退，但係佢自問身材唔夠玲瓏浮凸，只好放棄。後來，一位兼職做攝影模特兒嘅女同學得悉佢原來想做模特兒，便同佢講身材並唔係最重要，大前提係要建立個人獨特風格，加上珉希嘅身材並唔輸蝕，雖然冇魔鬼級數，但仍然相當有睇頭，就係咁樣，珉希決定到模特兒事務所面試，憑住萌味之中帶點冷傲嘅氣質，結果成功被取錄，成為兼職攝影模特兒。作為一位另類形象嘅攝模，珉希冇諗過自己會咁快獲得人氣，而隨住知名度愈嚟愈高，珉希嘅自信心亦不斷增加，於是2012年正式成為職業模特兒。
同年珉希首次以賽車女郎身份喺賽事上登場，呢次唔單止係佢成為職業模特兒後首個工作，同時亦係佢第一次喺大型活動上演出。珉希表示原以為賽車女郎工作同攝影模特兒嘅工作差唔多，都係擺吓甫士畀人睇，點知落到場後卻發現，原來賽車女郎要同鏡頭有更多互動，而且要展現更多笑容，前者容易做到，但係後者卻係一個頗大嘅挑戰，皆因珉希比較Cool，平時唔係咁鍾意笑，因此賽事完結後佢自問表現唔算太好，不過擁有迷人身段及與別不同氣質嘅佢，仍然獲得唔少攝影師及觀眾嘅好評。
為咗可以獲得更多大型活動嘅經驗，事務所好快安排珉希喺多場賽事上演出，並且安排佢以車模身份喺國際車展上登場。有咁多磨練機會，經驗亦愈嚟愈豐富，珉希嘅表現愈嚟愈出色，而唯一不變嘅就係佢冷傲嘅風格，憑住呢個與別不同嘅氣質，令佢嘅人氣愈嚟愈高。雖然佢喺賽車女郎界及車模界獲得好成績，但問到佢最鍾意邊種工作時，佢表示最喜歡攝影模特兒工作，而未來佢希望能夠踩入廣告界，以更多唔同嘅平台同大家見面。
簡介：沈珉希自覺身材冇乜睇頭，但其實只係佢嘅個人觀感，事關近年經常以性感造型拍攝寫真嘅佢，身材非常吸睛，尤其係一對修長美腿，更係令人一見難忘，最重要係佢嘅女人味愈嚟愈濃，甚討男士們喜愛。如果大家想了解佢多啲嘅話，就要Click入呢個網站喇！
網址：http://cafe.daum.net/1004-minhee
出生地：首爾
身高：171cm
三圍：33-22-34
撰文：魂