釣金龜呢種行為，經常被人視為只有拜金女嘅所作所為，而喺美國情慾小說家雪麗‧湯瑪斯嘅作品《夢迴卡布里》中，卻話畀大家知拜金女背後有值得人同情嘅地方。故事講述同姨母一齊住嘅女主角伊莉珊德，一直以嚟都受到富豪姨丈嘅高壓控制，甚至經常受到暴力對待。伊莉珊德知道要生存嘅話，唯一嘅方法就係要不斷討好對方，有次因為姨丈要到外地傾生意，呢個時候姨丈要求佢做代表，接待嚟到屋企嘅10位社交界名人，伊莉珊德知道呢個係大好機會，就係要喺姨丈離家嘅3日內釣到金龜，然後離開姨丈嘅魔爪。到訪嘅賓客之中，有位叫做維爾嘅候爵，外表癡癡傻傻嘅佢原來係扮出嚟，實情係佢深知世情，而情願過住雙面人生，佢知道伊莉珊德嘅意圖，又眼見對方想對佢弟弟出手，於是布下一個局。查實維爾第一眼見到伊莉珊德時，已發現對方同經常喺佢夢中出現嘅女神相似，但係現實中嘅伊莉珊德充滿世俗味，究竟佢能否突破心扉，同呢位有所企圖嘅伊莉珊德喺埋一齊呢？