以前要識女仔，一定要黐實個電腦玩網絡聊天，隨住智能手機加網絡普及，今時今日想同陌生異性傾偈夠晒方便，如果你夠大膽嘅話，仲可以嚟個視像情慾網聊添！不過呢啲嘢唔可以隨便玩，更加唔好沉迷落去。有位女網民膽粗粗玩情慾短訊，起初諗住撩仔打發時間，點知遇着個幾啱Feel嘅男人，竟然同對方玩埋情慾視頻。佢表示：「起初幾刺激o架！最重要唔使見樣，又唔使有身體接觸，我哋玩得相當滿足。不過最近佢想約我出嚟，話我哋好啱嘴形，希望能發展成男女朋友關係。我有啲擔心，唔知應唔應該答應佢呢？」
愛羅：睇你講嘅嘢，估你嘅年紀都唔大。先唔講你玩呢樣嘢啱唔啱，如果你同得佢出去嘅話，你預咗下場一定係被人當情趣玩具咁玩。唔信嘅話，你咪試吓囉，只係唔好返嚟喊晒口話後悔。
J_Walker：玩玩吓之嘛，唔使咁認真呀？如果佢真係個正經男人，就唔會喺呢啲地方約女，仲要玩色慾網聊。不過，你都唔係好人嚟（口架）喇，同個陌生男人玩成咁，睇怕你早就已經心郁郁啦！
特選奶油包：呢個世界嘅網絡狗公有好多，你真係要小心啲，因為佢哋嘅目的，只係想同你啪啪啪，你以為佢真係愛你咩？不過你可能唔想談情說愛，而係想齋做，如果係，又唔怕出事嘅話，你咪去囉。
多隻手：網絡說話十有九騙，你做乜當真？千祈咪出去添呀！如果對方設局嘅話，你想走都難。做女仔嘅，梗係要識得保護自己啦！
撰文：魂