美國嘅情慾小說唔單止喺當地有相當大嘅市場，當中一啲著名作品更被翻譯成各種語言，好似天后級情慾小說家雪洛琳‧肯揚嘅作品《暗夜獵人：暗夜奪情》，就先後被翻譯成法文、西班牙文、德文及中文等。故事以具有超自然能力嘅吸血鬼男主角出發，性格孤獨及難以相處，只係佢嘅表面，潛藏喺佢內心深處卻有着溫柔同脆弱嘅一面。佢並非一出生就係吸血鬼，而係羅馬嘅貴族，因為被人背叛，為咗生存，佢賠上靈魂而變成吸血鬼，並以永生不死嘅暗夜獵人身份，喺黑夜世界盡力保護人類唔受邪魔侵擾。至於女主角泰碧莎自細練出一身對抗邪魔嘅功夫，性格強悍又熱情，令吸血鬼男主角陷入情慾漩渦之中。可惜男主角發現泰碧莎原來係佢世仇老婆個家姐，而呢個時候佢嘅家族正被另一股惡勢力密謀滅族，唯一解救嘅方法，就係要同已交惡2,000年嘅世仇合作，長達千年嘅仇恨，會唔會因為情慾而就此放低呢？