有個人客，去到一間夜總會飲酒，係由導遊帶來，召女相陪，飲到咁上下，對一個靚女曰：「你今晚陪我返酒店，願以二百元美元為酬勞，制唔制？」
女首肯，於是人客叫埋單，連出街鐘錢共七百二十元，人客拿出一張信用卡，女侍應生通知部長，部長曰：「我哋同呢間銀行冇往來，對唔住！」
人客曰：「我冇咁多現金，只能開張支票。」
人客對靚女曰：「你帶我去一間可以使用我信用卡嘅地方消夜至得。」
靚女曰：「我都唔知你嘅信用卡邊間合用。」
人客曰：「咁就返去我住嘅酒店餐廳，保證合用。」於是帶靚女返去酒店，求其食啲嘢之後就埋單，跟住上房，人客即刻攬住靚女又錫又摸。
靚女曰：「我哋唔係情人幽會，而係做買賣，過水先！」
人客曰：「你既然認為信用卡唔得，寫支票如何？」
靚女曰：「對唔住，我唔要支票，要現錢，你想辦法將支票換現錢畀我，可以向酒店換。」
人客曰：「咁麻煩。」
靚女曰：「唔麻煩，除衫着衫豈不是更麻煩，老實講，我收唔到現錢就要同你拜拜，請你即刻打電話與酒店出納部商量。」
人客十分憤怒，揮手曰：「你走啦！」
靚女曰：「當然走啦，冇錢鬼同講心呀！」十分谷氣，然後返回夜總會。
媽媽生曰：「你做乜返嚟，唔係同人客直落咩？」
靚女曰：「直鬼直馬，我懷疑呢個客人係流嘢，仙都唔仙吓，叫我信佢張支票，唔好搞我。」
媽媽生曰：「我哋公司都收咗佢一張支票，明日即刻要查吓至得。」
第二日，夜總會經理即刻去銀行兌支票，原來係空頭，於是報警。不久，警方捕獲騙子，媽媽生曰：「靚女，你係得！」
一九七六年四月二十六日