一講「哥德次文化」成件事即刻潮晒，咁其實「哥德」即係乜呢？作為行外人，只需知道起源於80年代初期的英國，受影響嘅包括有音樂、電影、美學、衣着等就夠喇！尤其係後者，事關哥德式打扮世界各地都有，特色係憂鬱、哀傷、神秘及黑暗，衣着風格則包含死亡搖滾（Deathrock）、雙性（Androgynous）、維多利亞風。之但係好多人經常將哥德風格與Heavy Metal混淆，唔想再搞錯？其實睇女就可以分辨得到，呢本書《Modern Gothic: The Photographic Art of Jamie Mahon》清楚教識你何謂哥德風格，皆因喺業界屢獲殊榮，又有攝影藝術學士學位嘅攝影師Jamie Mahon本身係哥德「死忠」粉絲，多年來鏡頭下都係一個又一個嘅哥德女神，性感冶艷，張張相都咁震撼，咪結集成寫真推出囉！先旨聲明，呢本寫真零裸露，但性感服飾經已挑戰底線，睇完包你腎上腺素飆升呀！