美國有唔少人氣女情慾小說家，伊莉莎白‧荷特就係其中一位，其作品特色係時而幽默，時而激情，又時而嚴肅，呢幾點正好喺作品《完美的幸福》中充分體現出來。其實佢嘅出道經過亦相當戲劇性，藝術系畢業嘅佢跟一位考古學家結婚，婚後先後誕下兩名孩子，直到孩子入讀幼稚園，母親提議佢去搵嘢做，結果佢走去寫情慾小說，卻出乎意料大受歡迎，從此展開情慾寫作生涯。
《完美的幸福》講述女主角海珞係一位才貌雙全兼係公爵嘅女兒，自細被教導成凡事要循規蹈矩嘅佢，對任何事情都要追求完美，因此成年後便跟完美無瑕，卻又枯燥乏味嘅貴族型男訂婚，點知初次遇上未來叔仔葛瑞芬勳爵時，卻動搖咗佢一直以嚟嘅價值觀。葛瑞芬勳爵一啲都唔完美，事關佢花花公子嘅行徑人盡皆知，而佢初時亦對海珞睇唔順眼，卻喺相處之中慢慢觸動咗佢嘅情感。海珞同葛瑞芬嘅愛火同慾火不斷糾纏，令兩人墮入道德同情慾嘅深淵，究竟呢段孽緣最後會發展成點呢？
書名：《完美的幸福》
售價：約HK$90
撰文：魂