有個打工仔，出咗雙糧，唔使憂柴憂米，自然可以洗腳唔抹腳，上去一間去慣去熟之架步，在樓梯口，見一個老婦人，拖住兩個細路，頻頻抹眼淚。他奇而問曰：「阿婆，你做乜？」
老婦人曰：「我個孫女在上邊做工，約定我來樓下等佢，話有錢畀我，但等咗幾個鐘都未見，佢媽媽有病，細佬又未有錢食飯。」
打工仔曰：「你個孫女叫乜名？」
老婦人曰：「叫李秋荷。」
打工仔曰：「我識佢，等我上去叫佢落來搵你，但係你哋未食飯，先去斜對面間茶餐廳食飯先。」取出廿元予老婦人，曰：「算我請，唔使客氣。」
老婦人稱謝，拖小童過去餐廳，打工仔上到去，大班曰：「難得你來捧場，是否叫番小茵？」
打工仔曰：「咪住，你同我查吓，有冇個小姐叫做李秋荷，叫佢來，我先坐呢位小姐。」
大班曰：「佢剛剛喊到雙眼腫晒，亦唔係好招呼，你係熟客，我點能夠畀呢種女你呀？」
打工仔曰：「唔拘，我開名叫佢，包唔會彈番佢轉頭，呢個女因乜事喊？」
大班曰：「佢要借糧，但係借到突晒，公司拒絕，佢就喊到唔收聲，既然你唔嫌棄，我歡迎你捧佢場。」
不久，大班帶一個女人來到，矮細而不能稱為嬌小，樣貌平常，佢果然喊到雙眼紅腫。
打工仔曰：「小姐唔好喊，我同你傾吓。」
女曰：「點解你會開名叫我？多謝，你想我點，隨便啦，我乜都應承你。」
打工仔曰：「我想你現在落去對面嘅茶餐廳見吓你阿婆，佢等你，呢處有二百元，係我送畀你，唔使講多謝，快啲去。」
女初則愕然，繼而伏在打工仔肩上喊出聲。
打工仔安慰佢曰：「不必難過，快啲去，今晚休息，唔好再開工，我亦會叫過第二個小姐。」
女拭淚曰：「我想報答你都唔得。」
打工仔曰：「我第二日再來捧你場，到時你手口並用報答我啦！」
一九七五年二月七日