李妍雅愛心女神

通常會用天使面孔加魔鬼身材嚟形容南韓嘅模特兒,事關作為女神,最能引起男士注意嘅莫過於呢啲外在因素,不過對於李妍雅嚟講,佢唔單止樣貌出眾同身材火辣,仲有溫柔而可愛嘅個性,難怪佢如此受歡迎。

優雅迷人

唔少南韓模特兒嘅發展之路,通常都係從佢哋讀書時期開始接觸模特兒工作,燃起興趣後再投身模特兒行列。不過對於李妍雅嚟講,佢嘅出道經過卻有啲特別,事關佢一直以嚟都冇諗過做模特兒。話說當時就讀首爾女子大學兒童研究學系嘅佢,一直都希望從事兒童教育及心理研究工作,縱然佢擁有迷人五官及高挑身材,並未諗過成為模特兒界一員。有次喺實習期間,佢幫忙拍攝功課用嘅短片,憑住優雅嘅外形,竟然引嚟模特兒事務所注意,對方問佢有冇興趣以講解員身份出席兒童產品展銷會,由於佢覺得呢份工作相當有趣,故此便答應。喺出席展銷會期間,妍雅覺得好奇怪,有唔少男士主動搵佢影相,原來佢哋以為佢係模特兒,事務所有見及此,於是就同妍雅話:「既然係咁,不如你試吓考慮轉做模特兒啦!」雖然佢從未諗過自己會成為模特兒,但經過多次合作後,其實佢對模特兒工作亦有興趣,就係咁開始兼職模特兒工作,直至2009年大學畢業後,便成為職業模特兒。

天使味道

有人問李妍雅,既然佢一直希望從事兒童工作,點解家陣又選擇做模特兒呢?佢解釋因為模特兒嘅工作壽命最多都係10至15年,因此跟住落嚟仲有相當時間畀佢重新發展兒童工作,而佢亦正好趁呢個機會讓自己見識一下唔同嘅世界。雖然佢抱住學習心態投身模特兒界,但其實佢對呢份工作相當認真,為咗彌補經驗不足,佢花咗唔少工夫並跟前輩學習,因此出道冇耐,事務所安排佢喺車展上以車模身份登場。雖然呢次係佢首次出席大型活動,不過佢事前做足準備工夫,故表現淡定,充分發揮出誘人魅力,尤其係佢溫柔嘅態度同婉約嘅個性,令人對佢留下深刻印象。成功嘅第一步為佢打下強心針,翌年佢便以賽車女郎身份喺超級冠軍賽車賽上亮相,呢次更係引嚟更大嘅哄動,皆因當時嘅賽車女郎大都以冶艷嘅造型示人,而佢憑住獨特嘅氣質散發出猶如天使嘅味道,揮低其他姊妹,成為賽場上嘅焦點。雖然妍雅嘅人氣愈益高漲,但仍未足以令佢登上頂級位置,因此2011年佢獲得事務所推薦,參加第12屆南韓文化與藝術獎賽車女郎組別比賽,對於妍雅嚟講絕對係一大挑戰,結果佢不負眾望,奪得最受歡迎賽車女郎獎,從此為佢嘅事業開拓出光明嘅道路。

精彩推介

簡介:李妍雅擁有迷人嘅樣貌及玲瓏浮凸嘅身材,但係佢最吸引大家嘅地方,在於佢溫柔嘅個性,大家有任何要求,佢都會盡量答應,如此可人,試問又點會唔得到大家嘅歡心呢?如果想了解佢多啲,就要Click入呢個網站喇!

網址:http://cafe.daum.net/ynna1004-story

李妍雅Profile

出生地:首爾

身高:170cm

三圍:34-23-34

撰文:魂