男人要吸引女性嘅注意好難，想吸引到心儀女性嘅注意更加難，皆因每個女性都有自己嘅口味。好似今期嘅筋肉男臂彎枕，報稱可以滿足寂寞女性嘅需要，而運動男則最受英國女性歡迎，至於電玩男，睇怕都係睇ACG角色嘅四仔嚟自娛好啲喇！
如果女士們唔想喺冬夜裏孤枕難眠，同時又想有強壯嘅臂彎畀到自己安全感嘅話，最好嘅方法就係搵番個筋肉型男友。不過霎時間好難搵到筋肉男友之餘，即使搵到，又怕對方畀唔到安全感自己，如果係咁嘅話，不妨買呢個「筋肉男臂彎枕」返屋企，滿足自己一顆渴望被保護嘅心。臂彎枕長58cm、闊48cm，外形倣效筋肉男嘅右邊上身設計而成，粗壯嘅手臂不但保護性一流，手臂上嘅肌肉更係設計得相當精緻，肩膊上嘅三角肌同手臂上嘅二頭肌，統統都畀齊晒你之餘，仲附上雄偉嘅胸肌及發達嘅腹肌，最重要係臂彎枕以純棉製成，感覺舒適，同時帶畀女士猶如被筋肉男攬住嘅感覺。呢個臂彎枕喺外國及日本網絡引起極多女性關注，而眾人嘅焦點除咗放喺臂彎枕發達嘅肌肉外，更在於佢胸肌上面嗰粒「車厘子」！有網民稱「車厘子」啱啱好對正口部，可以滿足一下吸啜慾望，亦有網民稱可以畀自己過吓手癮。話時話，唔知有冇巴打對呢個臂彎枕有興趣呢？
對女士嚟講，運動型男士定係書卷味男士吸引啲？可能大家會話各花入各眼，而早前英國有體育用品公司進行調查，睇吓鍾意玩乜嘢運動嘅男士，對女性更具吸引力。呢個由英國高爾夫球用品網站進行嘅調查，透過約會應用程式嚟睇吓有同冇填運動一欄嘅男性，對女性嚟講嘅吸引力有冇分別，結果有填嘅男性平均獲得94個女性邀約，冇填嘅男性則只得57個女性邀約。至於做邊種運動最受女性青睞呢？結果係獲得120個邀約嘅打欖球勝出，而第2位舉重則有117個邀約，第3位係高爾夫球有104個邀約，跟住第4位同第5位分別係獲得102個邀約嘅游水同97個邀約嘅拳擊，至於英國著名嘅足球僅排名第6位。話時話，點解有做運動嘅男性，會比冇做運動嘅男性受女性歡迎呢？據調查表示，女性之所以鍾意運動型男士，因為覺得可以令佢哋生出強健嘅小孩，真係信不信由你。
可能一般人會覺得對ACG女角色有性幻想係唔正常，但實情確係如此。而美國色情網站Pornhub早前便公布上年全球男士搜尋邊一個ACG角色嘅次數最高，結果頭3位都係被同一款網絡對戰遊戲角色包攬，先從第3位講起，佢就係嚟自《鬥陣特攻》（Overwatch）嘅女角色閃光（Tracer），搜尋次數超過260萬次，擁有美股嘅佢喺勝利時會趷股擺甫士，極之誘人；第2位嚟自同一款遊戲中嘅女角色慈悲（Mercy），搜尋次數超過270萬，有網民稱冷艷同美腿係佢最煞食嘅本錢；至於第1位就係同款遊戲中嘅人氣女角色D.Va，佢樣靚身材正，搜尋次數接近400萬，有人分析係同美國成人虛擬實景影片公司VR Porn搵嚟脫星Megan Rain飾演D.Va，演出VR四仔短片《D.Va Overwatch XXX Parody》有關。不過最奇葩嘅係喺同一個調查中，排名第16位嘅竟然係比卡超！究竟乜嘢人會對呢隻黃色精靈有性趣呢？
撰文：魂