有一間大公司寫字樓，男女職員數十個，其中某甲不甘長作打工仔，跳出來另打江山，果然畀佢創出一番局面，由小老闆變成大老闆。
一日，某甲返來公司，在寫字樓曰：「你哋波士返來未？」各人望吓，原來係某甲，見佢神氣得咁交關，冇人答，十分尷尬，走埋去某乙身邊，陪笑曰：「波士返來未，你一定知道。」乙曰：「你係邊位？我唔識你。」甲曰：「吓？你唔識我？我只係重咗廿零磅而已，以前我哋係同事，我就係某甲也。」
乙作沉思狀，曰：「以前我哋寫字樓有個同事係叫做某甲，同我哋係好老友，同飲同食，同埋打二四毫麻雀，有時賭一毫子一注十三張賭到天光。」
甲曰：「就係我。」乙曰：「唔係，以前同事阿甲，死咗好耐了，我哋大家都知。」甲滿面通紅，曰：「各位老友同我講笑。」乙曰：「多謝，我哋呢班窮鬼，邊處有福氣搵個咁發達嘅老友，你要搵波士，行入去自己搵啦，人哋話入廟拜神，入屋叫人，你入到來，有冇叫我哋一聲？只係話搵波士？你就係搵波士一個人，唔識我哋，既然你對眼搬咗上額頭，我哋亦當死咗個朋友。」甲羞慚無地，急急腳入去經理室搵波士，全寫字樓同事大讚阿乙好嘢，整到阿甲一戙都冇。乙曰：「未算，我仲有一招未出，你哋坐定定睇嘢啦。」不久波士送客，親自陪阿甲出來。乙曰：「甲老闆，咪行咁快，計埋條數至走。」甲聽見計數，停步不前。乙曰：「你記唔記得當年我哋賭十三張，一毫子一注，你輸咗九元六毫未找數，到現在，你發啦，點解唔清埋條舊數，發到咁交關仲欠人十元八塊，唔好聽啩？」甲面色紅完又青，憤怒至極矣，取出十元，曰：「還畀你。」
乙曰：「等我找番四毫畀你至走，本來咁耐唔還錢，利息都唔止四毫，不過我都唔會做到咁絕，要你畀利息。」
有個阿丙曰：「兄台有一次同我哋盡鬼腳，你應該出三元，但窮到冇錢畀，現在大概不成問題矣，請畀番三元出來。」甲更加難堪。
波士出來打圓場曰：「我來搞掂佢。」送甲出門，甲汗濕重衫矣。
一九七五年一月十三日