所謂人老精，鬼老靈，年紀愈大見得世面愈多，就愈識得走精面愈蠱惑，而日本美少女偶像北原里英出道逾10年就冇話蠱蠱惑惑，而係學識咗出「股」惑！今年26歲嘅北原里英不經不覺已經踏足藝能界逾10年喇，當初阿妹加入人氣美少女團體AKB48，到2015年就轉去姊妹團體NGT48並且擔任隊長，早前北原里英有感年紀漸大，決定脫離團體以個人形式發展。里英將會有佢主演嘅電影《Sunny/32》上映，為催谷人氣，她推出首本個人寫真集《そして》。有別於一般寫真集，今次里英冇選擇去沖繩又或者夏威夷拍攝，而係去越南。喺寫真集當中可以見到里英去到當地嘅自然環境展露姣好身段，亦會去到市集感受一下當地嘅風土民情，而重點就會放喺室內嘅性感演出，里英會揚長避短，少露唔係咁夠大嘅上圍，而多露又圓又翹嘅優質美股，實行「股」惑人心！