有個大老闆，在半山區有一幢樓，放盤要出售，事為一個經紀所悉，代為奔走，不久，知道有位太太想買，但唔係由佢經手，於是心生一計，去搵大老闆，曰：「我介紹一位太太來買樓，應該佔番一成佣金。」
大老闆曰：「不必麻煩你，我已經有個客，將近斟成。」
經紀曰：「如果唔經我手，你幾難斟得成。」
大老闆唔信，繼續與太太斟盤，講成以一百二十萬成交，只欠交吉日期未斟掂。
一日，經紀往訪太太，曰：「聽見你想買樓，我特來介紹，地點在半山區，主人急於放手，人哋買要一百二十萬，我介紹你，最多一百萬，但我要索十萬元佣金，如果有時間，我可以講到九十萬。」
太太曰：「你講地址我聽吓。」
經紀將地址講出，果然就係自己將近斟成那一間，太太曰：「如果你斟得到一百萬，我當然會以十萬元畀你作酬勞，但你有乜把握？」
經紀曰：「我當然有把握至來搵你，條件係你話佢知唔啱，就包你可慳番十萬。」
第二日，太太話畀大老闆知，決定不再斟，因為佢已經買成第二間，大老闆十分激氣。
經紀又去搵大老闆，曰：「你幢樓賣咗未？我有客人想買，現在請你講個老實價錢出來。」
大老闆曰：「一句講晒，要賣一百二十萬。」
經紀曰：「現時市道唔好，我出一百萬，你賣唔賣，如果唔賣，遲吓會跌到只值八九十萬。」
大老闆拒絕，但事實上，佢急於脫手，因為移民已經批准，賣清光產業之後就成行。
是日，經紀又來，曰：「老闆，一百萬，限即刻答覆，否則我個人客就唔要，原來你放盤放到滿天飛，幾個大經紀放謠言，話你座樓有鬼，所以要賤賣，嚇到冇人敢落手，事實上，人哋亦信，因為以你大老闆身份之地位，不必急於賣樓也。」
老闆愈想愈寒，終於答應一百萬成交，經紀略施小計，賺咗大老闆之十萬銀樓價。
一九七四年十二月二十八日
買樓呢個問題，真係纏繞香港人幾十年，而當年嘅半山區一層單位大約要幾錢呢？雖然地區唔同價錢有別，以位於北角半山寶雲道單位嘅當年價，可以參考一二。喺70年代中，一個四房兩廳連工人套房，面積約2,067平方呎嘅單位售價約為16萬元。如果根據呢個角度嚟睇嘅話，文中經紀賺到10萬佣金，真係相當和味！