有一間架步，一晚，忽然有人來查牌，當然係着晒燈，照一向習慣，係查吓有冇未成年少女，有冇報過案嘅失蹤少女，如果冇就平安大吉，人客都係絲毫無損。
是晚，一反常例，全部撈女掃晒上車，人客亦被有禮貌咁請晒去警署做證人，呢鑊杰矣，人客亦請埋落樓上豬籠車，同去差館。
本來，人客被請作證人，就有權話自行坐的士去，只係被拘捕先至冇此權利，但好多人客唔熟例，與撈女一同上豬籠車，在架步門口，就畀人睇到面紅耳熱，慘過行刑。
呢壇杰嘢，不久就傳到所有行家都知，跟住，收租佬走到一間架步，曰：「點解呢鑊嘢杰得咁交關？你哋因住，輪到你都唔出奇。」
老闆曰：「咁點搵食呀，難為我嘅人客，即係趕走財神，搞到冇財神上門之時，就你做埋矣。」
收租佬曰：「所以一個人，托杉都要識轉膊，你識轉膊未？望吓個日曆，現在係乜嘢日子？」
老闆曰：「我知，老番冬又到，咁點呢？將近老番冬就要趕走我嘅財神。」
收租佬曰：「你唔知真傻定假懵，年年如是，除咗畀例牌租之外，都要交臨時租者也。」
老闆曰：「原來咁做法就係立吓威，人客都被佢哋咁搞法，咁你做人客以後仲嚟唔嚟？我由今日起，唔再交租，乜嘢例牌、臨時，全部關人鬼事，有本事就再來掃我場啦，今次來就一命博一命。」
收租佬曰：「吓？黐咗線呀，你想點？租都唔畀，再來你又有乜符弗？」
老闆曰：「我最多連呢檔攤都唔要，同佢碌地沙，佢着威衫，我着爛衫，怕乜？」
收租佬曰：「點樣碌地沙？」
老闆曰：「你唔好忘記，有間廉記，我爆佢大鑊，連你收租都唔掂。」
收租佬曰：「兄弟，唔好咁大火氣啦，求財呀。」
夏灣拿
一九七四年十二月二十一日
「老番冬」係昔日嘅廣東俗語，意思即係聖誕節咁解。由於聖誕節同冬至時間相近，加上當年愛用「老番」稱呼西方人，故此老一輩香港人有呢種講法。當年香港聖誕節最大型嘅活動，就係去睇聖誕燈飾，而睇燈飾只能到中環欣賞，尖東嘅燈飾要去到80年代初先至出現，燈飾相當簡陋，只不過用燈泡砌成「聖誕快樂」等字樣而已。