有個打工仔參加旅行團赴泰國作五日遊，在一間浴室之金魚缸內，選中一個泰妹，甚靚但冇乜身材，沖涼之後，即刻搞掂，然後再沖涼、按摩，認真歎到極，因為兵荒馬亂，殺入亂軍之中，不及講價，事後打手勢，問泰妹要幾多錢，泰妹含笑無言。
打工仔予以十美元，女搖頭，以為二十，女亦搖頭，掹打手勢，良久，始知佢問住在何處，於是將酒店名及房間號數寫下。
是晚，打工仔參加旅行團之節目後，回到酒店，泰妹已經來到等候，手入房，親熱過新婚夫婦，第二日，本來一早起身有節目，打工仔脫隊，因為貪戀香衾，唔捨得起床。
同行有個老友曰：「你因住，泰國梅花，與越南玫瑰，同樣咁巴閉者也。」
打工仔曰：「你現在先至提醒我，遲矣，現在橫死掂死，最多返到香港即刻搵醫生打針。」
眨吓眼過咗四日，旅行團賦歸，打工仔認真唔捨得走，泰妹好似有萬縷柔情，將佢綁住，是晚，打工仔傾囊，將一百二十美元全部贈予泰妹，但泰妹只取五十美元，其餘納還，打工仔感到意外，泰妹似乎已經十分心足，以英文地址予打工仔，指一指自己個心，又指吓佢個心，打工仔明白，攬住佢錫完又鍚。
翌日，一早起身，早餐後就到機場，登機返港，只見泰妹已經來到，挽住一包手信，臨歧握別，淚汪汪，係如假包換之眼淚，握住手唔捨得放開，打工仔踏上登機梯，回首望，仍見泰妹揮手揚巾。
上機後，打工仔滿懷依依之情，打開手信睇吓，原來係一種由米粉及花生做成的甜食品。
同行之朋友曰：「你第一次去泰國，印象如何？是否諗住再去？」
打工仔曰：「點能夠唔再去，只係享受吓泰妹嘅蜜意柔情，就算清袋都抵。」
老友曰：「個個香港客都有泰妹送機，細佬，唔好迷得咁交關。」
雖然老友的說話是提醒他，但打工仔對那個泰妹仍懷念不已。
夏灣拿
一九七四年十二月十九日
「泰國梅花」同「越南玫瑰」係指性病，至於係指邊種性病呢？「泰國梅花」即係俗稱「花柳」嘅梅毒。梅毒係由梅毒螺旋體引起，而佢係喺愛滋病出現前最令人害怕嘅性病，感染後潛伏期2星期至3個月不等，亦有機會潛伏多年，甚至終身冇發作嘅情況。「越南玫瑰」即係淋病，由奈瑟淋病雙球菌引發，潛伏期一般為2至7天。由於當年安全套仍未盛行關係，故此去玩真係幾大風險o架！