有個打工仔，到一間架步，試過一個靚女，認為有翻點價值，凡是翻點，就成熟客，女婉轉投懷，倍加親熱，打工仔之印象更佳，於是不久之後，就打算梅花三弄。
是晚，打工仔上到去搵靚女，良久，來到，神情萎頓，問曰：「是否不妥？」摸吓佢手，慶合合，正在發高熱。曰：「你發緊燒，點坐得枱？」
女曰：「本來唔坐得，我在床上燒到天旋地轉，但大班話係熟客，叫我出來，介紹第二個女畀你，以免你落樓，所以我扶病出來。」
打工仔叫大班埋靚女一個大鐘。
大班曰：「介紹第二位小姐如何，靚女有病，恐怕慢客，對貴客唔住。」
打工仔曰：「不必，我送佢返入房休息，坐一陣就走。」
大班曰：「咁點係呀，多謝噃。」
打工仔送靚女返入房，見佢一上床就暈底，燒到炙手，乃叫大班入房，曰：「似乎非睇醫生不可。」
大班曰：「我哋唔知佢府上何在，佢從來冇話畀人知。」
打工仔曰：「如果你哋唔反對，我想帶佢去睇醫生，最好搵個姊妹幫手扶住吓。」
大班曰：「多謝到極，事實上喺呢處亦冇人得閒睇佢。」
打工仔問邊個小姐肯幫手，終於有個姐姐答應，但對大班講明，不能起佢鐘，於是，兩個人扶靚女落樓，上的士，去搵醫生，打針之後，姊妹曰：「最好去公寓開間房，畀佢休息，否則返到去，略為退燒，大班又逼佢扶病出來上枱矣。」
打工仔認為有道理，乃扶靚女去公寓開間房，曰：「邊個陪佢？」
姊妹曰：「我唔得閒，要返去搵食。」
打工仔曰：「算我唔好彩，惟有我陪佢。」
第二日，靚女退燒，只係仍然虛弱，對打工仔感激不已。
打工仔曰：「既然係朋友，自有患難扶持之義，你點解無家可歸？」
靚女曰：「唔好提，其實我今次病死好過，你救番我條命，我嫁畀你好唔好？」
打工仔曰：「可惜我未有老婆本。」
夏灣拿
一九七四年十二月十七日
「大鐘」係夜總會術語，另外仲有散鐘同街鐘。所謂大鐘即係玩家覺得囡囡啱心水並讓對方繼續陪坐，夜場大班就會幫客人起個大鐘。相對大鐘嘅就係散鐘，而70年代則稱做細鐘。大鐘同散鐘嘅分別在於一個鐘除開嘅票數唔同。舉例講：某夜場每票為8蚊，大鐘開40票，即係40乘8，咁每個大鐘收費即係320元；散鐘開35票，即係35乘8，每個散鐘收費為280元。不過大鐘嘅票數唔一定多過散鐘，視乎每個場嘅安排，邊樣抵玩玩家自己計喇！