金仔約幾個老友飲茶，講出心事，曰：「我打算結婚，因為呢個未婚妻已經拖咗幾年，怕夜長夢多，所以早日搞掂，現在經濟情況唔係幾好，我唔想請飲，岳母大人唔肯，請起上來就煩極，我哋公司六七位同事，你話點呢？請一個唔請一個，則恐怕有人責怪，但請客，我負擔又重，而且唔想令人破費，事實上好多人認為請帖係『紅色打單信』。」
老馮曰：「唔使擔心，我哋幾個老友，同你搞掂，務求不必你傷腦筋。」
金仔曰：「點樣搞掂？」
老馮曰：「我哋先行與各同事商量，願意做人情者，就寫個名，不願做人情，唔簽名，我哋把呢張名單交畀你寫帖，咁就冇撞板，至於人情，公價五十元，每席十二人，收六百元，你訂四百銀菜，二百銀下欄，有賺。」
金仔曰：「唔該晒，認真係老友。」
好日子來臨，金仔在酒樓設喜筵，寶客雲集，八時入席，九時有得食，新郎新娘敬酒時，唔見老馮，問幾個老友，都話唔見佢面，金仔周身唔安樂。
眨吓眼，上到炒飯伊麵，仍然未見老馮來，此時已經十點幾，金仔驚到六神無主，幾個死黨老友，一樣咁擔心，因為佢身懷巨款，各同事之人情禮金，夾埋將近三千元在佢身上，唔知有冇遇着刀仔黨，劫銀之外，篤佢兩刀，入咗醫院。
男女主家送客之時，老馮先至趕到，猛話對唔住，金仔見佢來，心事放下一半，送完客，問曰：「你有咩意外？點解搞到依家至嚟？」
老馮曰：「總之係意外。」取出五千元，曰：「慢慢至計數，你用住先。」跟住話請幾個老友上夜總會。
死黨曰：「你中咗四重彩？咁闊佬。」
老馮曰：「好驚險，我揸住二千幾銀入場賭夜馬，以為扑兩場位置，點知死火，後來博一博，買一千元星月，執番盤幾水，至趕返來找數。」
死黨曰：「輸埋又點？」
老馮曰：「我都唔知點，總之驚險。」
一九七四年十二月十四日
文中嘅「盤幾水」即係幾多錢呢？原來喺香港俗語中，一萬元又稱為「一盤水」，因此呢度所講嘅「盤幾水」即係萬幾銀咁解。話時話，香港當年嘅平均收入有幾多呢？據劉蜀永《簡明香港史》中嘅資料顯示，1974年香港工人嘅平均時薪為26.79元，換言之月薪約804元，能夠贏得萬幾銀，真係要去開心吓。