一年容易又Hea過，打工仔當然無得Hea啦，講緊係寫真界嚟到今年最後一個月，似乎都冇一本話題作品，究竟係囡囡唔掂、出版商睇淡後市，定抑或兩者皆是呢？冇人知，反而時尚界就踩過界，早前推出一本高檔寫真《Private Nudes》為寫真界製造高潮！全書128頁，由意大利時尚攝影師Leonardo Glauso親自操刀。呢位攝影師來頭甚猛，係國際時裝刊物《Resuer》雜誌編輯及創始人。1989年出生於佛羅倫斯嘅Leonardo Glauso，20歲開始攝影工作，早喺時尚攝影界起朵，目前喺米蘭與世界各地名模及國際時裝品牌合作。佢嘅作品遍布《GQ》、《P Magazine》、《Penthouse》及《Schön》等刊物，可以話少年得志呀！
講番呢本寫真《Private Nudes》，據官方網站表示Leonardo Glauso年中影女無數，尤其係裸女，之所以咁鍾意女性裸體唔係鹹濕咁簡單，係因為美麗、性感、獨特及色情，同時透過裸體攝影擺脫道德規範，因此要鏡頭下嘅模特兒表達自由奔放，講到幾偉大呀！總之簡單一句，要Leonardo Glauso拿起部相機拍攝，囡囡事必要時尚、色情及充滿淫蕩氣息！講咗咁多Leonardo Glauso嘅背景，巴打有理由相信佢嘅寫真即使唔用超級名模或脫星都唔會衰得去邊！的確，《Private Nudes 》內全部係名不經傳嘅裸模，想扮高檔扮高深不妨買本了解一下啦！版本有英文、德文、法文、西班牙文及意大利文，問題係睇相嘅嘢點解要有咁多唔同語言呢？
撰文：祖