有間工廠，老闆做事沉實，對伙記照顧得十分周到，所以生意不俗，在淡風中仍穩步上升，該廠出產一種新穎牛仔布衫褲，第一批出二百打，寄到外國，四小時內銷清光，有間大公司，立刻派營業主任及採購主任來，準備與老闆簽合同，加工趕二千打，並自動提高售價。
老闆見到大客，叫個伙記阿威，去一間大酒樓，訂一個貴賓廳請客。
阿威問寫幾多錢菜左右。
老闆曰：「二千銀樓下啦，太寒酸又唔好，亦不必食到大滿漢。」
阿威訂兩席，除寫字樓職員外，工場師傅級亦請埋來飲餐，每席都坐十個人。
有個燙衫師傅阿添去到酒樓，剛啱兩個老番人客亦來到，幾個男女侍應，一齊湧上前招呼，阿添就冇人理，呆咗，佢嬲起上來，大聲叫：「阿威。」
伙記曰：「你做乜嘢？」
師傅添曰：「我搵阿威，因為發記工廠在此請客。」
伙記曰：「等陣啦。」大概伙記見佢大聲嘈，條氣唔順，罰佢企一陣。
此時，工廠老闆行出來，見師傅添曰：「點解你唔入來？」
師傅添曰：「冇人帶路呀，我點知，有兩個鬼佬入來，就有幾個伙記招呼，我入來就叫我企在外面等吓。」
老闆十分唔高興，即刻對阿威曰：「你係咁意寫百零銀菜，叫齊廠中學師仔、雜工來擦一頓，我哋去第二間。」
部長聞得人客要走，連忙來留駕，又道歉又認錯。
老闆曰：「你哋令我個伙記唔開心，現在你免費請我食乳豬鮑翅席都係假。」跟住話畀兩個老番客人知，另外去第二間酒樓至食飯。
老番人客問因乜事，老闆曰：「佢哋待慢我嘅伙記。」
部長苦留不獲，工廠老闆已經帶埋兩個老番離開，去第二家酒樓。
不久，工廠之雜工及學師仔到，阿威是但叫百零二百銀晚飯小菜，部長條氣頂住，省到班伙記立立靚。因為現在百業蕭條，難得有一單大生意上門，竟然被不禮貌的伙記趕走，部長豈有不氣頂之理。
一九七四年十二月十二日
「大滿漢」即「滿漢全席」，清朝康熙帝66歲大壽時，曾為漢、滿兩族特設3天6宴，提供300多款佳餚，並御書「滿漢全席」而名噪一時。滿漢全席分大滿漢、小滿漢，大滿漢一般為108碟，小滿漢為64碟，由於當中部分名饌烹調技巧已失傳，現時要重現清朝時期嘅滿漢全席經已唔可能。