唔講冇人知，原來九龍油麻地廟街附近一帶，現在成為遊客觀光區之一，以前廟街以「企業家」馳名，但現在已經式微，大把設備良好之架步，有乳膠床兼沖涼缸，上到去靚女任揀，頂級「企業」矣。
夜後，廟街之地檔，百貨雜陳，衣服鞋襪、收音機、錄音機、手袋……以至手巾牙刷、眼鏡，無不齊備，此外，大牌檔更加熱鬧，由炒幾味小菜，以至炒蜆、東風螺、牛雜、炸生蠔、糯米飯……以至花生豬骨粥，琳琅滿目，鑊氣蒸騰。
有幾個遊客，在一個導遊帶引之下，在街檔選購牛仔褲和毛衫，十零銀一條褲，等於二美元左右，大喜，買完又買，款式新穎，顏色奪目之毛衫，亦只賣廿餘元，五美元左右。
一個女遊客曰：「點解平得咁交關？」
導遊曰：「此乃香港貨，小販直接去工廠買貨，親自運到市場來，省回批發家所賺之佣金及運輸費，所以廉宜。」
幾個遊客，買到冇辦法攜帶先至罷手。
導遊又帶佢哋去食街邊檔，花生豬骨粥、炒瀨粉，皆嘆為美味，食完找數，每客七角美元，幾個遊客，一齊大叫「溫特浮」，即係話有冇搞錯，奇怪，點解平得咁交關。
導遊曰：「該區名為平民夜總會，所有小販都以廉價取勝，但廉價而又味美，希望各位貴客滿意。」
原來呢批外國遊客，一共六十餘人，只係其中五人，另外聘導遊行夜市，話明要到有地方色彩之地方，唔上夜總會，亦唔去大餐廳，導遊乃帶佢哋去油麻地夜市觀光，果然令佢哋開心到極，滿載而歸。
同團而來之朋友，見佢哋買到咁平嘅牛仔褲同毛衫，更聽見佢哋講平民夜總會之風光，為之神往，連忙叫對方介紹導遊，帶埋佢哋晚上去行吓。
是晚，旅行團本來有個舞會由香港之旅行社主辦，作為惜別，但只得一半人參加，因為有成半人跟咗私家導遊去廟街買平貨，食炒蜆、東風螺、花生豬骨粥之類，呢批遊客，話第二時非來過不可，原來香港有咁吸引人之夜市。
現在世界各地的經濟也陷入不景，那些遊客也懂得打慳皮算盤，不想買貴嘢，而要導遊帶他們去買平嘢，因今時不同往日也。
夏灣拿
一九七四年十二月九日
之所以叫做「廟街」，皆因附近有座天后廟，雖然唔少人知道佢有「平民夜總會」嘅外號，但其實佢仲有另一個外號叫「男人街」。不過大家唔好誤會，因為嗰度多鳳姐吸引唔少慾火男嚟解決生理需要，先至有呢個名，查實當年呢度以販賣男性用品為主，例如針織衫、牛仔褲、手錶、唱片等男士有興趣嘅商品關係而得名。話說回來，今時今日廟街最出名嘅食物，相信非豬骨粥而係煲仔飯。