香山阿黃日前在本報有幅漫畫，寫甜嘢加價，鹹嘢減價，諷刺力之強，有一針見血之妙，原來所有大細鹹格，與半鹹不淡之格，全部吹淡風，大家競相減價，務求賤物鬥窮人。
有位玩家自台北返來，話現時香港之鹹格，平過台灣唔知幾多，台灣閒閒哋要成張紅底先至可以問津，但香港就一張紅底可以耍樂兩次。
話說有一間架步，連收租佬嘅租都敢欠，唔使講都係唔掂到極，是晚，收租佬大駕光臨。搵老闆，伙記曰：「半個月都唔見人，我哋點晒燈籠火把搵佢都唔見。」
收租佬曰：「咁搞法，即係害我，我惟有害番你哋而已。」
伙記曰：「隨便你點做啦，現在我哋寶號，本來已經死咗，不過各伙記同幾個小姐，合力維持，借屍還魂而已，正係唔打都死，你求其輕輕向我哋吹一口氣，我哋就全部碌低，現時呢碗飯有得食又死，冇得食又死，因為人人只得半碗。」
收租佬嘆曰：「慘啦，你唔掂時我亦唔掂，點算？」
此時，有個小姐出來，問鐘房借住十元，伙記曰：「點解唔坐多陣，或者會有人上來。」
小姐曰：「鬼影都冇隻，不如返去陪吓老公，但係我現在車錢都冇，你唔度一張畀我，我明日冇車錢返來。」
伙記曰：「今晚未做過生意，我又係算到見底，六親同一運，你落街兜個圈，睇吓有冇人眼甘甘望住你，有就帶佢上來。」
小姐曰：「唔好搞我，隨街拉人客，你估我有手令。」
收租佬嘆氣，回身便走，伙記曰：「阿叔，留步，你幫趁佢一個鐘好唔好，今晚真係未發市。」
收租佬曰：「吓？作到我呢一筆，冇租收我已經頂住條中氣，尚要叫我捧場。」
伙記曰：「當做善事啦。」
收租佬曰：「怕咗你，我借十元畀你，第日還。」
此時，有幾個小姐出來，大聲問是否有錢借，嚇到收租佬飛跑落樓。
一九七四年十二月五日
「鹹格」即係我哋今日所講嘅馬檻，昔日同現今嘅營運方式差唔多。不過點解文中嘅香港經濟環境會咁差，差到連小姐都冇錢搭車返屋企呢？原來1973年3月發生股災後，唔少人因炒燶股票而破產，甚至有傳言青山醫院因股災而爆棚，經過幾年嘅回氣，香港嘅經濟先至慢慢恢復。