話十個男人有九個都係心邪真係冇錯（口架）！事關日本早前出現一間愉虐健身室，即時引嚟網民熱議，以為呢間係風俗店，其後發現原來係一間正宗健身室，結果吸引更多人想去試吓。不過講到心邪，又點及得上日本有個十八禁漫畫家喺見到個海椰子後，畫出一張令人心動嘅漫畫呢！
早前日本涉谷出現一間名為「秘密GYM」（秘密ジム）嘅另類健身室，佢另類嘅地方在於糅合健身同愉虐兩種元素，健身室內燈光昏暗，而女健身教練以一身超火辣皮衣加絲襪高踭鞋嘅造型示人，唔知以為係愉虐風俗店。至於玩法係，每當客人未能按指示做出要求嘅動作及次數時，女教練就會用皮鞭、低溫蠟燭、手銬、乳頭夾等愉虐系情趣道具嚟招呼，迫使對方要繼續做落去直至達標為止。不過，客人唔使擔心會畀其他人見到情況而尷尬，事關健身室設有多個獨立房間，換言之客人同女教練係以一對一形式進行鍛煉，就算客人嗌到拆天都唔使擔心會影響其他人。
可能有人覺得呢班所謂女教練只不過係巧立名目，本身嘅教練水平有待商榷，如果咁諗就錯，事關佢哋確實係專業嘅健身教練，同時擁有職業愉虐女王嘅身份，故此對M屬性又想健身嘅男士嚟講，絕對有吸引力。由於新開張關係，推出每次7,800日圓（約538港元）嘅初次體驗價，大家記得先進行電話或網上預約呀。
每次見到呢個號稱全球最大型果實嘅海椰子時，總會聯想到佢「女陰果」嘅外號，事關佢嘅外形實在冇辦法唔令人諗歪，而落喺日本十八禁漫畫家手上，所繪畫出嚟嘅畫面更係相當誘人！話說日本十八禁漫畫家Inuburo早前喺植物園見到展出嘅巨型海椰子時，令佢即時聯想起美少女渾圓嘅美股，佢更將聯想化為圖畫，以海椰子作為原型，變成一個趷高美股嘅美少女圖畫，然後放上Twitter分享，同時留言指：「呢個係植物園展出嘅完美果實。」出色嘅畫功加上像真嘅美少女，即時喺網上成為話題，認為佢展現出大家一直以嚟對海椰子嘅幻想。事實上，海椰子唔單止為Inuburo帶嚟邪念，就連原產地塞舌爾群島嘅島民，都相信海椰子具有提升性能力嘅作用。原來海椰子係一種雌雄異株嘅植物，而佢正正係雌株結出嚟嘅果實，而雄株嘅果實則同男性生殖器官相似，因而令大家將佢同性愛扯上關係。雖然海椰子外形好十八禁，但其實佢係一種珍貴嘅植物，從最初喺塞舌爾群島5個海島上均能發現佢嘅蹤迹，現時只係喺普拉蘭島南部嘅五月谷內有4,000幾棵海椰子樹生長。
現今部分蜜運男女會選擇婚前同居，既可以互相深入認識，又可以作為婚前熱身，甚至有人認為有個竇，唔使去酒店排隊等爆房。不過有英國公司進行嘅調查發現，同居未必會令性生活變得多姿多采，反而會令人減少性趣。喺受訪嘅情侶中，有百分之三十七表示當同居之後，性活躍程度因此而減少，只有百分之十三嘅受訪者指出，佢哋嘅性愛次數有增加。性趣減少嘅原因，有受訪者表示由於同居之後大家嘅生活習慣唔同，容易出現摩擦，故此令到性趣大減。當中最嚴重嘅問題係家居空間，據調查團隊表示，同居男女因為要喺原有嘅空間內擺放兩個人嘅物品，尤其係當女士搬到男友屋企居住時，衣物嘅儲存空間便會嚴重不足，以致活動空間減少，而喺呢種狹窄嘅生活環境當中，性趣自然會受到影響。另外，亦有受訪者指出因為同居生活愉快，飲食亦因此變得冇以前咁注重健康，以致身體變得肥胖，令到彼此對性愛嘅熱情大減。
撰文：魂