喺男士嘅心目中，長髮美女往往同溫柔體貼及女人味扯上關係，而短髮美女則有種冷艷兼拒人於千里之外嘅感覺。嚟自南韓嘅朴荷，雖然以短髮造型縱橫模特兒界，卻予人一種爽朗又熱情嘅感覺，甚討男士歡喜。
如果大家有留意嘅話，大部分模特兒都留有一把長髮，而短髮則比較少，不過少又唔代表冇，好似朴荷就係其中一個。朴荷嘅花名又叫做薄荷，皆因喺韓文中兩者嘅寫法同讀音都係一樣。雖然佢喺大學時期做過兼職模特兒，不過當時佢冇諗過會作為自己未來嘅職業，皆因工作比較唔穩定，因此畢業之後佢便成為一個普通嘅上班族。
後來佢發現自己對模特兒工作仍有熱誠，令佢萌起重投模特兒行業嘅念頭。縱然佢有意再闖模特兒界，如果冇外形嘅話，卻一切僅流於空想。而漸漸成熟嘅佢，不但變得有女人味，身材亦玲瓏浮凸，尤其係一對胸器惹人遐想之餘，短髮形象亦係吸引模特兒事務所嘅重要元素。據講，當時事務所覺得佢短髮形象相當清新，而且予人外冷內熱嘅感覺，呢種氣質喺業界少有，就係咁樣，2014年佢以攝影模特兒身份登場。經過一輪熱身後，終於迎嚟首次喺大型公開活動演出，以賽車女郎身份喺超級豪華跑車比賽上亮相，性感嘅造型固然成為全場嘅焦點，加上清爽嘅氣質，備受大家注目。
外冷內熱嘅氣質、前凸後趷嘅火辣身材加上清爽短髮嘅形象，令朴荷極速喺業界冒起，而佢嘅身影經常出現喺釜山、首爾等地嘅賽車場上。不過作為一位全心全意投身事業嘅模特兒，活動範圍又點止於此，除咗經常以賽車女郎身份工作外，朴荷亦化身成車展模特兒及攝影模特兒，出沒於各大車展及攝影活動中。雖然佢已經有相當嘅人氣，但係仍然覺得未夠，因此去年參加綜合格鬥舉牌女郎大賽，憑住與別不同嘅外形及氣質，順利打入第4循環，正當大家視佢為奪冠熱門之際，卻因為個人理由而退出比賽，雖然如此，但係佢已經喺唔少人心中留下深刻嘅印象。
作為一位人氣模特兒，總係希望能夠畀到大家新鮮感，唔知朴荷有冇諗過轉換一下髮型呢？佢表示曾經試過留長髮，之但係同自己嘅性格唔係咁夾，始終覺得短髮最適合自己。另一方面，係同迷信有關，佢話喺留長髮嘅日子，工作唔多順利，亦經常出現情緒低落，當剪短髮之後，一切變回正常，佢坦言自己係個迷信嘅人，相信長髮唔係咁適合佢，從此以後便決定以短髮示人，而佢會花心思喺造型上面，就係轉換頭髮嘅顏色，不過佢一定唔會染古靈精怪嘅顏色，七彩顏色更加唔會試喎。
簡介：朴荷予人一種外冷內熱嘅感覺，外冷呢點相信唔難明，只係內熱又如何體現呢？據朴荷身邊嘅朋友講，思想成熟嘅佢經常充當大姐姐嘅角色，經常幫朋友解決情感嘅問題，而一啲重要嘅事佢都會主動提出由自己擔當，難怪佢喺模特兒圈中嘅人緣相當好。如果大家想了解佢多啲，就要Click入呢個網站喇！
網址：http://cafe.daum.net/modelBak-Ha
出生地：首爾
身高：168cm
三圍：34-25-35
撰文：魂