正當大家都樂於置身於圖像世界時，文字卻往往能夠提供更大嘅想像空間，而呢點正正係成人小說嘅迷人之處。不過想體驗到美妙嘅情慾文字世界，作者嘅文字功力絕對唔可以差，而嚟自美國嘅情色作家帕蜜拉‧克萊兒（Pamela Clare），便透過佢嘅著作《非法危情》（Extreme Exposure）為大家展現呢個慾望國度。帕蜜拉嘅來頭唔細，本身係一位專欄作家同調查報道記者嘅佢，曾喺美國獲得多個記者獎項，並被科羅拉多州記者協會頒發終身成就獎。不過對情慾小說情有獨鍾嘅佢，則透過呢本以火辣愛慾嘅作品，將大家帶入一個前所未有嘅情慾領域。
故事講述卡拉係著名嘅女記者，一直以嚟佢抱住天不怕地不怕嘅宗旨，揭露過多宗震動社會嘅真相。呢次佢收到一個自稱「吹哨人」嘅密件，對方冒住被殺人滅口嘅風險，送上關於一間礦業公司大規模污染環境嘅資料，隨住卡拉深入調查，同時佢亦面對各種形式嘅恐嚇同威脅。不過卡拉最大嘅對手，卻係參議員瑞斯。呢位男神級嘅國會議員，雖然面對卡拉嘅質問，但仍然表現得游刃有餘，而呢種氣質表現更贏得卡拉嘅歡心，兩人更發展成肉體關係。正當卡拉深陷瑞斯嘅情網之際，佢發現「吹哨人」嘅真身竟然就係瑞斯！究竟瑞斯策劃呢場礦場風波嘅目的係乜，而卡拉喺情感同慾望嘅糾纏下，能否作出中立嘅判斷呢？
書名：《非法危情》
售價：約HK$105
撰文：魂