男人同女人天性唔同，思維同睇法唔一樣，對於成人漫畫同偽娘文化嘅睇法，男同女亦有極大分別。不過最令男人感到意外嘅係，英國有調查發現女人唔重視男伴嘅兵器大小，反而着重喺兵器嘅外觀上，真係估佢唔到！
如果有一日男友話你知佢愛上着女裝嘅話，你會有乜反應呢？日本變裝愛好者兼著名男小說家仙田學，早前喺網上以「當你了解嘅熟人，如家庭成員或戀人，有做偽娘嘅興趣時你會點樣做？」為主題，然後問出兩條問題，（一）當你嘅男友講出佢有着女裝嘅習慣，並希望以女裝扮相同你一齊出街，你會一齊出去嗎？（二）你遇過着女裝嘅男人嗎？如果有嘅話，令你印象最深刻嘅係咩呢？女網民對問題（一）嘅回覆都幾特別，年齡介乎18至25歲嘅女士表示好樂意同女裝扮相嘅男友一齊出街，並且會幫男友裝扮添！另外，有40歲嘅女士指，如果對方係男性朋友，並着住花花衫裙，面上又化咗個Bling Bling妝嘅話，一齊出門時定會引嚟騷動；若然係男友的話，佢會嘗試去理解對方；如果係屋企人，例如老公嘅話，佢一定會感到擔心同困擾。
至於問題（二），年齡介乎18至25歲嘅女士認為偽娘嘅表現相當了不起，因為佢哋堂堂正正咁展現自己嘅喜好；另外，有女網表示佢前男友係一位偽娘，對方會Send女裝扮相嘅自拍照畀佢，而佢覺得好可愛！雖然呢班女網民嘅回覆普遍都接受偽娘，但大家要留意因為呢個調查係喺仙田學嘅個人Twitter上進行，故此當中大部分網友都係仙田學嘅粉絲同支持者。話說回來，唔少人都混淆咗偽娘同Lady Boy，雖然兩者都係男兒身，但前者冇做過手術改變自己嘅外形，大家要留意喇！
男人對於自己嘅兵器大小，總會或多或少感到不滿，究竟有幾多男人唔滿意自己嘅兵器呢？早前有篇關於男性對生殖器官滿意度嘅調查同研究，喺國際性研究學院官方刊物《Archives of Sexual Behavior》上發表，調查訪問咗4,100名男士，研究佢哋對自己生殖器官嘅睇法，結果發現有百分之二十七嘅受訪男士唔滿意自己兵器硬直前嘅長度，百分之十九唔滿意硬直後嘅長度，另外有百分之十五唔滿意粗壯度。研究人員針對呢群不滿嘅受訪男士，問佢哋喺性生活上嘅滿足度，發現當中只有百分之三十九表示每周有性行為，足見佢哋對性事唔係咁積極。
其實英國男士嘅兵器平均長度為5.2吋，並唔算短，所以唔使灰心，而且喺另一個最新調查結果指出，英國女士唔多注重男士兵器嘅長短，反而重視兵器嘅外觀。原來英國女士對於兵器上皮膚有冇粒粒、係咪有過長嘅包皮同有冇污垢相當重視，如果出現呢啲問題嘅話，會影響佢哋嘅性趣。另一方面，英國女士相當介意男士嘅毛毛過長、似亂草同有異味，從而導致佢哋冇晒上床興趣。至於兵器嘅長度，喺英國女士嘅關注度只排第6位，換言之佢哋並唔介意短小男，咁所以男人毋須再為兵器長短而煩惱喇！
漫畫讀者不分男女，而日本十八禁漫畫亦是如此，因此出現專門畀男性同女性睇嘅成人漫畫。對於男性成人漫畫迷嚟講，梗係覺得專門畫畀男人睇嘅成漫好睇啲，而對女性成漫迷嚟講，卻覺得針對女性成漫迷所畫嘅作品過癮啲。不過話時話，究竟男性專享同女性專用嘅成人漫畫喺劇情鋪排上有乜嘢分別呢？
日本同人漫畫家兼輕小說作家貓太喺個人Twitter上，圖解「女性向與男性向色情書刊的差異」（女性向けと男性向けのエロ本の違い），當中嘅「エロ本」直譯做色情書刊，但其實係指成人漫畫及小說。咪講笑，身為ACGN界中人嘅貓太嘅分析又真係幾精闢！佢指出女性向色情作品嘅內容好似西餐一樣，先要好好咁描繪兩人點樣從日常生活發展到親密關係，跟住再經歷一番波折，然後再互相調情兼有前戲，至會發展到啪啪啪地步，激情過後，仲要情話綿綿，情況就等同西餐咁有齊前中後菜加甜品一樣。至於男性向嘅成人漫畫就好似豬扒丼，即係一嚟就直入正題兼食到飽，乜嘢前奏同後戲都唔需要，最緊要快靚正！呢個Post一擺上網即刻引嚟網民嘅共鳴，有網民好認真分析指女性着重感情，男性則講求快捷，有網民更抵死稱烏冬比豬扒丼更加貼切。點解？因為烏冬食得仲快。
撰文：魂