經常介紹外國成人小說嘅中文翻譯版著作，有人就問係咪喺中文世界中，冇具代表性嘅情慾小說作品呢？當然有啦，好似呢本由台灣女作家安謹所著嘅《落日》就係其中一本。呢位自稱係信仰愛與和平嘅孤獨患者，並喜歡用寫作思考人生嘅作家，先後著有《心鎖》、《如汐》、《有生之年》、《緣情書》等成人小說，其作品嘅特色多以百合為題材，透過淡淡卻又觸動人心嘅情慾場面，引發大家無限嘅想像。
《落日》嘅主角係精神科醫生尤安南，有日佢遇到一個人生難題，就係自細認識嘅好友秦洛陽突然向佢求婚，其實尤安南早就知道對方對自己嘅愛意，只係應該點樣定義呢段關係，卻係佢一直以來最唔想面對嘅問題。原來自從佢哋目睹一齣悲劇之後，令佢哋本嚟一帆風順嘅人生，自此出現翻天覆地嘅變化。痛苦摧毀咗尤安南，而面對秦洛陽嘅小心翼翼，更令佢變得逃避退縮，情願將時間停留喺當年，而唔願意繼續深入地發展落去。雖然佢情願將自己困喺避風港，但面對積極又主動嘅秦洛陽，卻無時無刻令尤安南處喺情感十字路上。究竟呢對曾經互相緊靠嘅二人，喺經歷過同樣嘅傷痛後，大家點樣各自走出自己嘅困境，同時兩人關係會唔會拉近呢？最重要係一顆已經破碎嘅心，又係咪真係可以縫補起來呢？
書名：《落日》
作者：安謹
頁數：280頁
售價：約HK$75
撰文：魂