日男性能力強勁定孱弱？

無能の誤會

日本男人點解會予人無能嘅印象呢？咁就要從20幾年前源於西方嘅笑話開始講起。話說當年日本乃係經濟強國，面對日本財閥入侵，眼紅嘅西方人就喺日男嘅兵器上製造話題，取笑佢哋兵器短小。另一方面，日本人做愛嘅次數真係好少，加上近年「草食男」，甚至「佛系男」嘅出現，營造出日男唔願意曳曳嘅形象，因而予人錯覺以為日男嘅性能力孱弱。雖然日男嘅性能力唔係頂級同超卓，但係喺世界平均值嚟計，佢哋唔算係最差。

勁愛啪啪啪

正所謂「有心有力」，曳曳梗係要有心先至會有行動力，而根據日本國立社會保障人口問題研究所，喺2015年進行嘅一個全國性發表一份報告指出，喺20至24歲年齡層嘅男性中，針對性愛熱情度喺「非常鍾意」、「鍾意」、「一般」、「唔鍾意」同「討厭」中揀選一項，結果發現有6成男性表示非常鍾意啪啪啪。雖然隨住年紀增長，表示「非常喜歡」嘅男性有所下滑，但整體仍然有超過5成，當中百分之三點八嘅60歲以上男性更表示，佢哋一星期有6至7次性行為，絕對係有心有力。

持久力唔差

既然日男咁有心有力，就要睇吓佢哋喺現實生活中嘅床上持久力如何。根據瑞典一個情趣用品公司喺2014年進行嘅「性愛世界盃」（World Cup of Sex）調查發現，日本男士嘅床上持久力一啲都唔差，同哥倫比亞、澳洲，甚至美國都有得揮。另外，有網上嘅調查指，日男平均啪啪啪時間為14分36秒，雖然比法國男士嘅15分鐘相差約半分鐘，甚至同「持力王」巴西男士嘅超過30分鐘相差一倍多啲，但相較中國男性嘅11分20秒，卻係贏咗3分幾鐘。當然，呢啲所謂持久力嘅調查只供參考，皆因每個男士嘅體質都唔同，加上生活環境又好難作出比較，但係照咁嚟睇，日男嘅持久力同一般亞洲人都差唔多啫。

唔係最細

唔少人認為亞洲男士嘅兵器，相對歐美男士嚟講係袖珍啲，尤其係日男最細，事實又係咪咁呢？根據數據網站「AVG.HIGHT」嘅全球平均兵器長度排行榜嘅資料顯示，佢哋綜合全球各個研究及數據後，喺被列入榜中嘅116個國家中，日男憑住平均10.92公分排行第107位，而香港則以平均11.19公分排106位，至於中國則以平均10.89公分排喺日本之後，至於名列榜首嘅係剛果共和國嘅17.93公分。

不過喺另一個由安全套品牌做嘅調查中，指日男嘅兵器平均長度為13公分，咁係咪代表日男嘅兵器其實比較長呢？根據另一個網站「TargetMap.com」關於全球男士兵器長度嘅資料顯示，日本同香港男士兵器長度其實差唔多，從呢個角度嚟睇，港女又真係唔使驚會畀巨鵰嚇親。

睾酮少性慾下降

根據日本國立社會保障人口問題研究所嘅報告中發現，日本有6成18至34歲適婚年齡男士表示，佢哋並無交往對象，而已婚男士又稱性生活不足。前者根據日本媒體分析，係同日本經濟不穩、日女太過難搞，令日男嚮往獨處，甚至認為不需要女朋友；後者則因生活空間擠迫，唔少夫婦習慣分房瞓，加上工作及家務過重而缺乏性趣所致。

另外，根據美國匹茲堡大學（University of Pittsburgh）嘅流行病學教授Jane Cauley所領導嘅團隊，喺收集香港、日本、瑞典、多巴哥島及美國共5,000名男士嘅血液樣本中，發現西方男士嘅睾酮水平差唔多，其後係香港，而最低係日本。睾酮嘅作用係增強性慾，如果睾酮少就會導致性慾低下，而導致少嘅原因，係同生活環境、工作壓力、飲食同缺乏運動有關，從此可以說明點解日男缺乏性慾。

撰文：魂